ఏయిర్​ విస్తారాకు బాంబు బెదిరింపు

3.5 గంటలు గాలిలో ప్రయాణించి ఢిల్లీకి చేరుకున్న విమానం!
విమాన సిబ్బందిని నిలదీసిన భద్రతాధికారులు
హైజాక్​ అయ్యే భయాందోళనల నేపథ్యంలో ఢిల్లీకి తీసుకొచ్చామని వివరణ

నా తెలంగాణ, న్యూ ఢిల్లీ: లండన్​ నుంచి ఢిల్లీకి బయలుదేరిన విస్తారా విమానానికి బాంబు బెదిరింపు కలకలం సృష్టించింది. బుధవారం ఢిల్లీకి చేరిన ఈ విమానాన్ని వెంటనే అప్రమత్తమైన ఏయిర్​ పోర్ట్​ భద్రతా బలగాలు సేఫ్​ జోన్​ లోకి తరలించారు. ప్రయాణికులు, వారి లగేజీలను క్షుణ్ణంగా తనిఖీ చేశారు. అనంతరం విమానాన్ని కూడా పూర్తిగా తనిఖీ చేసి బెదిరింపు ఉత్తిదే అని గుర్తించారు. విమానం టాయిలెట్​ లో టిష్యూ పేపర్​ పై బాంబు ఉన్నట్లుగా రాసి ఉండడంతో ఓ ప్రయాణికుడు సిబ్బందికి సమాచారం అందించాడు. దీంతో ప్రయాణికుల్లో ఆందోళన మొదలైంది. బాంబు బెదిరింపు వచ్చినా స్థానిక విమానాశ్రయంలో ఆపకుండా 3.5 గంటలపాటు ఎందుకు ప్రయాణించారని, జరగరానిది జరిగితే ఎవరిది బాధ్యత అని విమానసిబ్బంది, పైలెట్లను భద్రతా సిబ్బంది నిలదీశారు. విమానం హైజాక్​ అయ్యే సూచనలు కూడా ఉన్నాయని తమలో భయాందోళనలు ఉన్నందువల్లే నేరుగా ఢిల్లీకి తీసుకువచ్చామని వారు తెలిపారు. ఈ విమానంలో మొత్తం 300 మంది ప్రయాణిస్తున్నారు. ఈ విషయంపై ఏయిర్​ పోర్ట్​ అధికారులు విచారణ ముమ్మరం చేశారు.