టైటానిక్​ శిథిలాలను చూసేందుకు మరో సబ్​ మెరైన్​ ట్రైటాన్​ సిద్ధం

నా తెలంగాణ, సెంట్రల్​ డెస్క్​: టైటానిక్​ శిథిలాలను చూసేందుకు మరో సబ్​ మెరైన్​ సిద్ధమవుతోందని అమెరికన్ రియల్ ఎస్టేట్ బిలియనీర్ లారీ కానర్ వెల్లడించాడు. ఇందుకోసం కానర్ ట్రైటాన్ 4000/2 ఎక్స్‌ప్లోరర్ అనే సబ్‌మెర్సిబుల్‌ను రూపొందించినట్లు తెలిపారు. దీన్ని రూపొందించేందుకు రూ.166 కోట్లు ఖర్చయిందన్నారు. సముద్రంలో 4 వేల మీటర్ల లోతుకు ట్రైటాన్​ వెళ్లగలదు. అయితే ఈ జలాంతర్గామి ఎప్పుడు సముద్రంలోకి వెళుతుందనే విషయాన్ని మాత్రం కానర్​ వెల్లడించలేదు. 
సముద్రం ఎంత అందమైనదో అంతే శక్తివంతమైనదని కానర్​ పేర్కొన్నారు. ప్రపంచానికి టైటానిక్​ శిథిలాలను చూపించాలన్న ఉత్సుకతతోనే తాను ఈ నిర్ణయం తీసుకున్నట్లు తెలిపాడు. తమ ఈ ప్రయాణం అన్వేషణలో నూతనాధ్యాయాన్ని సృష్టించగలదని విశ్వాసాన్ని వ్యక్తం చేశారు. 

గతంలో జూన్‌ 18న టైటాన్‌ సబ్‌మెరైన్‌ అట్లాంటిక్‌ సముద్రంలో మునిగిపోయింది. 4 రోజులపాటు శ్రమించి దీని శిథిలాలను టైటానిక్​ నౌకకు 1600 మీటర్ల దూరంలో గుర్తించి బయటకు తీసుకువచ్చారు. ఇందులో ఐదుగురు ప్రముఖులు మృతిచెందారు. అయితే ప్రస్తుతం ట్రైటాన్​ ను రూపొందిస్తున్న బిలియనీర్​ లారీ కానర్​ కు అమెరికా అంతరిక్ష సర్టిఫికెట్​ ఉండటం గమనార్హం. ఈయన అమెరికా అంతరిక్ష యానంలో భాగస్వాములయ్యారు.