కాంగ్రెస్ అబద్ధాలతో అధికారంలోకి వచ్చింది: అన్నామలై
Annamalai said that Congress has cheated people in Telangana in the name of guarantees
- దేశ భవిష్యత్ యువత చేతిలోనే: అన్నామలై
- బీఆర్ఎస్ కు బుద్ధి చెప్పినట్లే కాంగ్రెస్ కూ చెప్పండి
- జమ్మికుంట యువ సమ్మేళనంలో బీజేపీ తమిళనాడు అధ్యక్షుడు
నా తెలంగాణ, కరీంనగర్: కాంగ్రెస్ పార్టీ ఆరు గ్యారంటీలతో ప్రజలకు అబద్ధాలు చెప్పి అధికారంలోకి వచ్చిందని, ఇచ్చిన ఏ హామీని అమలు చేయడం లేదని బీజేపీ తమిళనాడు అధ్యక్షుడు అన్నామలై విమర్శించారు. దేశ భవిష్యత్ యువత చేతిలోనే ఉందని, దేశం కోసం మోదీ కోసం ప్రతి ఒక్కరూ ఓటు వేయాలని ఆయన కోరారు. ఈ మేరకు సోమవారం జమ్మికుంటలో కరీంనగర్ ఎంపీ బండి సంజయ్ కు మద్దతుగా నిర్వహించిన యువ సమ్మేళనంలో అన్నామలై పాల్గొని మాట్లాడారు. ‘‘ఎన్నికల ముందు ఎన్నో హామీలు ఇచ్చిన కాంగ్రెస్.. అధికారంలోకి వచ్చాక గాడిద గుడ్డు చూపిస్తున్నది. మోదీజీని రెండు నెలల క్రితం రేవంత్ రెడ్డి బడే భాయ్ అన్నారు. మూసీని గుజరాత్ లోని సబర్మతి నదిలా మారుస్తామని అన్నారు. అంతలోనే ఇప్పుడు మాట మార్చి గాడిద గుడ్డు చూపిస్తున్నారు. తెలంగాణ యువత మొన్నటి అసెంబ్లీ ఎన్నికల్లో కుటుంబ పాలన సాగించిన బీఆర్ఎస్ ను గద్దె దించారు. ఈ ఎన్నికల్లో కాంగ్రెస్ కు బుద్ధి చెప్పాల్సిన అవసరం ఉన్నది. బండి సంజయ్ కేవలం కరీంనగర్ లీడర్ మాత్రమే కాదు.. సౌత్ ఇండియా లీడర్. బీఆర్ఎస్ ప్రజా వ్యతిరేక విధానాలపై బండి సంజయ్ అలుపు ఎరుగని పోరాటం చేశారు. ఆయన ప్రజా సంగ్రామ యాత్రను మేము అధ్యయనం చేసి తమిళనాడులో చేపట్టాం. బండి సంజయ్ గెలుపు యువత, పేదల పక్షాన కొట్లాడే గొంతుక అవుతుంది”అని తెలిపారు.
