అలుపెరుగని మహానీయుడు అంబేద్కర్​

నా తెలంగాణ, న్యూ ఢిల్లీ: సమానత్వం, నిరుపేదల సంక్షేమం కోసం అలుపెరుగని మహానీయుడు డాక్టర్​.బీ.ఆర్​. అంబేద్కర్​ అని ప్రధాని నరేంద్ర మోదీ అన్నారు. శుక్రవారం అంబేద్కర్​ 69 వర్థంతి సందర్భంగా పార్లమెంట్​ ఆవరణలో మహాపరినిర్వాణ దినోత్సవం నిర్వహించారు. ఈ సందర్భంగా ప్రధాని మోదీ అంబేద్కర్​ కు నివాళులర్పించారు. అనంతరం ప్రధాని తన అభిప్రాయాలను పంచుకున్నారు. రాజ్యాంగ నిర్మాత ప్రతీ ఒక్కరి గౌరవాన్ని దృష్టిలో పెట్టుకున్నారని అన్నారు. అంబేద్కర్​ పోరాట పటిమ తరతరాలకు స్ఫూర్తిగా నిలుస్తుందని పేర్కొన్నారు. అంబేద్కర్​ నిబద్ధత భారతదేశ చరిత్రలో సువర్ణాక్షరాలతో లిఖించబడుతుందన్నారు. ఈ సందర్భంగా ప్రధాని మోదీ కాంగ్రెస్​ జాతీయాధ్యక్షుడు మల్లిఖార్జున ఖర్గే నివాళులర్పించేందుకు రాగా ఆయనతో కరచాలనం చేస్తూ మాట్లాడారు. లోక్‌సభ స్పీకర్ ఓం బిర్లా, ఉపరాష్ట్రపతి జగదీప్ ధన్‌ఖర్, మాజీ రాష్ట్రపతి రామ్‌నాథ్ కోవింద్, కేంద్రమంత్రులు, ఎంపీలు అంబేద్కర్​ కు నివాళులర్పించారు.