రాజ్యసభలో నోట్ల కట్టలు!

నా తెలంగాణ, న్యూ ఢిల్లీ: రాజ్యసభలో కరెన్సీ నోట్లు దొరికాయని చైర్మన్​ జగదీప్​ ధంఖర్​ ప్రకటించారు. శుక్రవారం ఉదయం రాజ్యసభ సమావేశాలు ప్రారంభమైన వెంటనే విషయాన్ని తెలపడంతో సభలో గందరగోళం నెలకొంది. దీనిపై పూర్తి విచారణ జరుగుతుందన్నారు. అంతవరకూ ఈ నోట్ల కట్టలు ఎవరివన్నది చెప్పలేమన్నారు. 500, 100 నోట్ల కట్టలు దొరికాయన్నారు. 222 సీటు కాంగ్రెస్​ ఎంపీ అభిషేక్​ మను సింఘ్వీ సీటు వద్ద లభించినట్లు తన దృష్టికి వచ్చిందన్నారు. దీంతో కాంగ్రెస్​ సభ్యులు అభ్యంతరం వ్యక్తం చేశారు. గురువారం సభ ముగిసిన అనంతరం తనిఖీలు చేపట్టగా నోట్ల కట్టల విషయాన్ని తన దృష్టికి తీసుకువచ్చారని తెలిపారు. దీనిపై దర్యాప్తునకు ఆదేశించానన్నారు. పేరు చెప్పడంపై కాంగ్రెస్​ ఆందోళన వ్యక్తం చేయడంతో కేంద్రమంత్రి కిరణ్​ రిజిజు మండిపడ్డారు. సింఘ్వీ పేరు చెబితే తప్పేంటన్నారు. రాజ్యసభలో నోట్ల కట్టలు దొరకడం సమగ్రతకు భంగం అని చైర్మన్​ ఉద్దేశ్యమన్నారు. అంతేకానీ సింఘ్వీవే నోట్ల కట్టలు అని అర్థం కాదన్నారు. ఏది ఏమైనా దీనిపై సమగ్ర దర్యాప్తు జరగాలన్నారు. జేపీ నడ్డా కాంగ్రెస్​ ఆందోళనపై మండిపడ్డారు.  

చైర్మన్​ నోట్ల కట్టల అంశంపై ఎంపీ సింఘ్వ స్పందించారు. తాను ఒకే ఒక్క రూ. 500 నోటు తీసుకొచ్చానన్నారు. 12.57కు సభలోకొచ్చానని, ఒంటిగంటకు సభ వాయిదా పడటంతో క్యాంటీన్​ కు వెళ్లానన్నారు. మధ్యాహ్నం 1.30 గంటలకు పార్లమెంట్​ నుంచి వెళ్లిపోయానని సింఘ్వీ తెలిపారు.