వైద్య విద్యార్థిని అత్యాచారం, హత్య సీబీఐ అదుపులో నిందితుడు

కోల్‌కతా: ఆర్జీకర్​ మెడికల్​ కాలేజీ వైద్య విద్యార్థిని అత్యాచారం, హత్య కేసులో ప్రభుత్వం, ఆసుపత్రి యంత్రాంగం తీరుపై రోజురోజుకు విమర్శలు, ఆరోపణలు ఎక్కువవున్నాయి. సాక్ష్యాలను తారుమారు చేసే ప్రయత్నం చేస్తున్నారని బుధవారంవైద్య విద్యార్థులు ఆరోపిస్తూ సామాజిక మాధ్యమాల్లో ఆసుపత్రిలోని గోడలను బద్ధలు కొట్టిన వీడియోలను షేర్​ చేశారు. హత్య జరిగిన ఆసుపత్రిలో పునరుద్ధరణ పేరుతో సెమినార్​ హాల్​ కు 20మీటర్ల దూరంలో ఈ పనులు చేపట్టడం సాక్ష్యాలను తారు మారు చేయడమేనని అన్నారు. 

అదే సెమినార్​ హాల్​ లో వైద్య విద్యార్థిని మృతదేహం లభించింది. దీంతో విద్యార్థుల ఆరోపణలకు బలం చేకూరుతోంది. 

కాగా బుధవారం ఉదయం సీబీఐ నిందితుడు సంజయ్​ ను అదుపులోకి తీసుకుంది. పోలీసులు, అధికారుల నుంచి కేసుకు సంబంధించిన వివరాల ఫైళ్లను స్వాధీనం చేసుకొని విచారణకు సమాయత్తం అవుతోంది. 

ఇదిలా ఉండగా, ట్రైనీ వైద్య విద్యార్థుల సంఘం ఫోర్డా చేపట్టిన ఆందోళనలు మూడో రోజుకు చేరుకున్నాయి.

కోల్​ కతా, అసోం, ఢిల్లీ సహా పలు ప్రాంతాలలో జూనియర్​ డాక్టర్లు సమ్మెకు దిగారు. తమ భద్రతకు కేంద్ర, రాష్ర్ట ప్రభుత్వాలు ప్రత్యేక చట్టాన్ని తీసుకురావాలని డిమాండ్​ చేస్తున్నారు. అదే సమయంలో అత్యాచారం, హత్య కేసులో పర్తి నిజానిజాలు వెలుగులోకి తీసుకురావాలని డిమాండ్​ చేస్తున్నారు. వీరి సమ్మెతో రోజువారీ రోగులకు ఇబ్బందులు తప్పడం లేదు.