కింగ్ మేకర్ ను ముంచిన ప్రజలు
జేఎస్పీ ప్రశాంత్ కిషోర్ కు బిహార్ లో చుక్కెదురు భవిష్యత్తు ప్రశ్నార్థకమే
పాట్నా: రానున్న ఎన్నికల్లో తానే కింగ్ మేకర్ గా భావించి బిహార్ లోని నాలుగు స్థానాల్లో పోటీకి నిలిచిన ప్రముఖ ఎన్నికల వ్యూహకర్త ప్రశాంత్ కిషోర్ కు తీవ్ర పరాభవం తప్పలేదు. ప్రజలు ఆయన పార్టీనీ ఏ మాత్రం గుర్తించని విధంగా ఓటింగ్ సరళితో స్పష్టమయింది. శనివారం ఓట్ల లెక్కింపు సందర్భంగా బిహార్ లో జరిగిన నాలుగు స్థానాల ఉప ఎన్నికల్లో జన్ సూరజ్ పార్టీ ఏ మాత్రం ప్రభావం చూపించలేక చతికిలపడింది. తారీరీలో 3, రామ్ గర్ లో 4, ఇమామ్ గంజజ్ లో 3, బెలగంజ్ లో 3వ స్థానంలో నిలిచింది. తొలిసారిగా ఉప ఎన్నికల్లో రంగంలోకి దిగిన ప్రశాంత్ కిషోర్ అన్ని పార్టీలకు ఎన్నికల్లో గెలుపోటములపై జోస్యం చెప్పి ఒడ్డుకు తీసుకురావడంలో సఫలీకృతుడయ్యాడు. కానీ తాను సొంతంగా స్థాపించుకున్న పార్టీకే జోస్యం చెప్పుకోలేక చతికిల పడడంతో ఆయన పార్టీ భవితవ్యంపై నీలినీడలు కమ్ముకున్నాయి. బిహార్ లో కింగ్ మేకర్ గా నిలవాలనుకున్న ఆయన ఆశలు అడియాశలే అయ్యాయి.
