మూడో రోజులు 75 విమానాలు రద్దు

నా తెలంగాణ, న్యూ ఢిల్లీ: ఎయిర్​ ఇండియాను ఉద్యోగుల కష్టాలు వదలడం లేదు. వరుసగా మూడో రోజు శుక్రవారం కూడా ఈ సంస్థకు చెందిన 75 విమానాలను రద్దు చేశారు. మూడు రోజులపాటు వరుసగా రద్దవుతున్న విమానాల వల్ల సంస్థకు రూ. 30 కోట్ల మేర నష్టం వాటిల్లినట్లు సంస్థ అధికారులు అంచనా వేస్తున్నారు. ఇది ఎయిర్​ ఇండియాకు భారీ నష్టమేనని పేర్కొంటున్నారు. అయితే ఆదివారం నుంచి యథావిధిగా విమానాలను నడపనున్నట్లు ఆ సంస్థ ప్రకటించింది. ఇప్పటివరకు 260 విమాన సర్వీసులు రద్దు చేసినట్లు ప్రకటించింది. 

అయితే ఎయిర్​ ఇండియా ఉద్యోగుల్లోని రెండు సంఘాల్లో ఒక సంఘం ఉద్యోగులు తిరిగి విధుల్లో చేరాలని నిర్ణయించారు. సంస్థ 25 మందిని తొలగిస్తున్నట్లు ఉత్తర్వులను కూడా ఉపసంహరించుకోనున్నట్లు పేర్కొంది. దీంతో ఉద్యోగులు కూడా ఒక మెట్టు దిగి వచ్చారు. ఎయిర్​ ఇండియా ఎయిర్​ ఏషియాతో విలీన నిర్ణయాన్ని తీసుకుంది. దీన్నే ఉద్యోగులు వ్యతిరేకించారు. సంస్థలో మొత్తం రెండువేల మంది క్యాబిన్ సిబ్బందితో సహా ఆరువేల మంది ఉద్యోగులున్నారు.