75 బీఆర్వో ప్రాజెక్టులు ప్రారంభం
75 BRO projects started
కేంద్రమంత్రి రాజ్ నాథ్ సింగ్
రూ.2,236 కోట్ల ఖర్చు
22 రోడ్లు, 51 వంతెనలు
2024–25కు రూ. 6500 కోట్ల కేటాయింపు
సురక్షిత, బలమైన భారత్ దిశగా అడుగులు
మోదీ కల సాకారానికి రక్షణ శాఖ కీలక పాత్ర
కోల్ కతా: రక్షణ శాఖ పటిష్టానికి, సరిహద్దులో మౌలిక సదుపాయాల కల్పనకు కేంద్ర ప్రభుత్వం కట్టుబడి ఉందని కేంద్ర రక్షణ శాఖ మంత్రి రాజ్ నాథ్ సింగ్ అన్నారు. రూ. 2,236 కోట్ల విలువైన 75 బోర్డర్ రోడ్స్ ఆర్గనైజేషన్ ద్వారా చేపట్టిన మౌలిక సదుపాయాల ప్రాజెక్టులను ప్రారంభించారు. ఇందులో 22 రోడ్లు, 51 వంతెనలు, 11 రాష్ర్టాలు, కేంద్ర పాలిత ప్రాంతాలకు చెందిన ప్రాజెక్టులున్నాయి.
పశ్చిమ బెంగాల్ లోని సుక్నాలో త్రిశక్తి కార్ప్స్ హెడ్‌క్వార్టర్స్ నుంచి ప్రాజెక్టులు ప్రారంభించారు. ఈ సందర్భంగా రాజ్ నాథ్ సింగ్ మాట్లాడుతూ..2014 నుంచి 2024 వరకు కేంద్ర ప్రభుత్వం ఆధ్వర్యంలో బీఆర్ వో చేపడుతున్న ప్రాజెక్టులకు గణనీయంగా నిధులను కేటాయించామన్నారు. 2024–25కు సంబంధించి కూడా రూ. 6500 కోట్లను కేటాయించామని తెలిపారు. రక్షణ, సరిహద్దును బలోపేతం చేయడమే లక్ష్యంగా ఈ చర్యలు తీసుకున్నామని తెలిపారు. ప్రతికూల వాతావరణంలో సైతం తామనుకున్న లక్ష్యాలను విజయవంతంగా పూర్తి చేశామని తెలిపారు. ప్రధాని మోదీ విజన్ 2047 వికసిత్ భారత్ దిశగా రక్షణ శాఖ కల సాకారంలో కీలక భూమిక పోషిస్తుందన్నారు. ప్రపంచంలోన సురక్షితమైన, బలమైన దేశంగా భారత్ ఎదుగుతోందని కేంద్ర మంత్రి రాజ్ నాథ్ సింగ్ స్పష్టం చేశారు.
