కువైట్ లో భారీ అగ్నిప్రమాదం 41మంది మృతి
30 మందికి కాలిన గాయాలు.. మృతుల్లో అత్యధికులు భారతీయులు.. బాధితులను పరామర్శించిన భారత రాయబారి ఆదర్శ్.. విదేశాంగ మంత్రి జై శంకర్ విచారం కార్మికులకు అండగా ఉంటాం.. భవన యాజమాని అరెస్టుకు కువైట్ మంత్రి ఆదేశం .. ప్రధాని మోదీ తీవ్ర విచారం
నా తెలంగాణ, న్యూ ఢిల్లీ: కువైట్ లో భారతీయులు పనిచేస్తున్న లేబర్ క్యాంపులో భారీ అగ్నిప్రమాదం సంభవించింది. ఈ ప్రమాదంలో 41 మంది అక్కడికక్కడే మృతిచెందగా, 30 మందికి గాయాలయ్యాయి. మృతుల్లో ఎక్కువ మంది భారతీయులున్నట్లుగా కువైట్ లోని భారత రాయబార కార్యాలయం బుధవారం తెలిపింది. మంగాఫ్ లోని బుధవారం ఉదయం ఓ భవనంలో అగ్నిప్రమాదం సంభవించింది. ఆరు అంతస్థుల భవనంలో అంతా కార్మికులే ఉంటున్నట్లుగా స్థానిక పోలీసులు తెలిపారు. వంటగదిలో మంటలు చెలరేగి భవనం మొత్తం వ్యాపించాయన్నారు. అగ్నిప్రమాదానికి పూర్తి కారణాలపై దర్యాప్తు చేపట్టామని పోలీసులు వెల్లడించారు. ఈ భవనంలో మొత్తం 160 మంది కార్మికులు నివసిస్తున్నారని వారంతా ఒకే సంస్థలో పనిచేస్తున్నట్లుగా పోలీసులు గుర్తించారు.
అగ్నిప్రమాదంలో గాయపడిన వారిని భారత రాయబారి ఆదర్శ్ స్వైకా పరామర్శించారు. పూర్తి సహాయం అందజేస్తామని హామీ ఇచ్చారు. ప్రస్తుతం వారి ఆరోగ్య పరిస్థితులు నిలకడగా ఉన్నట్లు తెలిపారు.
అగ్నిప్రమాదంపై విదేశాంగ శాఖ ఎస్.జైశంకర్ మాట్లాడుతూ విచారం వ్యక్తం చేశారు. ప్రమాదంలో ప్రాణాలు కోల్పోయిన వారికి సంతాపాన్ని ప్రకటిస్తూ వారి కుటుంబ సభ్యులకు ప్రగాఢ సానుభూతిని వ్యక్తం చేశారు. గాయపడిన వారు త్వరగా కోలుకోవాలని ఆకాంక్షించారు. ఈ విషయంలో భారత్ కార్మికులకు అండగా ఉంటుందన్నారు.
కాగా అగ్నిప్రమాదంపై మంత్రి షేక్ ఫహద్ అల్ యూసఫ్ స్పందిస్తూ వెంటనే భవన యాజమానిని అరెస్టు చేయాలని ఆదేశాలు జారీ చేశారు. భవిష్యత్ లో ఇలాంటి ఘటనలు పునరావృతం కాకుంఆ చర్యలు తీసుకుంటామన్నారు.
ప్రధాని మోదీ విచారం..
కువైట్ లో జరిగిన అగ్నిప్రమాదంపై ప్రధాని నరేంద్ర మోదీ విచారం వ్యక్తం చేశారు. మృతి చెందిన వారికి సంతాపం వ్యక్తం చేస్తూ వారి కుటుంబ సభ్యులకు సానుభూతిని వ్యక్తం చేశారు. గాయపడిన వారు వీలైనంత త్వరగా కోలుకోవాలని ప్రార్థించారు. ఈ ఘటనను కువైట్ లోని భారత రాయబార కార్యాలయం నిశితంగా పరిశీలిస్తోందన్నరు. బాధితులను అన్ని రకాలుగా ఆదుకుంటామని ప్రధాని మోదీ భరోసా ఇచ్చారు.
