జ్ఞానవాపీ,శ్రీ కృష్ణ జన్మభూమి.. సోదరభావంతో ఇచ్చేయాలి

పూణె: ఆక్రమణ దారుల దాడుల్లో 35‌‌00 దేవాలయాలు ధ్వంసం అయ్యాయని, ముస్లిం సోదరులు జ్ఞానవాపీ,కృష్ణ జన్మభూమి ఆలయాలు హిందువులకిచ్చేస్తే మిగతా ఆలయాల వైపు చూడబోమని శ్రీరామ జన్మభూమి ట్రస్ట్​ కోశాధికారి గోవింద్​ దేవ్​ గిరి అన్నారు. దేవ్​ గిరి 75వ జన్మదిన వేడుకలు 4 నుంచి ఫిబ్రవరి 11వ తేదీ వరకూ పూణేలో వివిధ మతపరమైన కార్యక్రమాలు నిర్వహిస్తున్నారు. ఈ సందర్భంగా పూణెలోని అలందిలో ఆయన మీడియాతో మాట్లాడారు. మానవాళి గతంలో కాదు వర్తమానం, భవిష్యత్తులో జీవించాలన్నారు. దేశానికి ఒక పక్కా ప్రణాళిక, మంచి భవిష్యత్​ ఉండాలంటే హిందువులకు ముస్లింలు సోదరభావంతో మెలగాలన్నారు. పెద్ద ఎత్తున దేవాలయాల ధ్వంసం అనేవి దేశంపై అతిపెద్ద మరకలని విచారం వ్యక్తం చేశారు. ఈ రెండు దేవాలయాలను అందజేస్తే మరింత సోదరభావం పెరిగేందుకు ఇతర సమస్యల పరిష్కారానికి కూడా శాంతియుతంగా ముగుస్తాయని ఆశిస్తున్నట్లు దేవ్​ గిరి తెలిపారు. భారత నవ నిర్మాణంలో సమస్యలను శాంతియుతంగా పరిష్కరించుకుంటేనే మంచిదని ముస్లిం సమాజం కూడా ఇందుకు సిద్ధంగా ఉందని అయితే దీన్ని కొందరు మాత్రం వ్యతిరేకిస్తున్నారని  గోవింద్​ దేవ్​ గిరి ఆరోపించారు.