మీరు దేశం పేరును నిలబెట్టారు
You have upheld the name of the nation
– మనుబాకర్ తో ప్రధాని
– కాంస్యం ఆనందం, ఉత్సాహాన్నిచ్చింది
– ఫోన్ లో మాట్లాడిన నరేంద్ర మోదీ
నా తెలంగాణ, శాతోవు(ఫ్రాన్స్): ‘మీరు దేశం పేరును నిలబెట్టారు. కాంస్యం సాధించడమే కాకుండా షూటింగ్ లో పతకం తెచ్చిన తొలి భారత మహిళగ చరిత్ర లిఖించారు.’ అంటూ ప్రధాని మోదీ.. ఒలింపిక్ కాంస్య విజేత మనుబాకర్ ను ప్రశంసలతో ముంచెత్తారు. మను పతకం అందుకున్నాక ప్రధాని నరేంద్ర మోదీ ప్రత్యేకంగా ఫోన్ చేసి అభినందించారు. మను బాకర్-మోదీ మధ్య ఫోన్ సంభాషణ సాగిందిలా...
మోదీ: మను.. నమస్తే. మీకు శుభాకాంక్షలు.
మను: థాంక్యూ సర్. ఎలా ఉన్నారు?
మోదీ: మీరు విజయం సాధించారన్న వార్త విన్న తర్వాత ఉత్సాహం, ఆనందంతో ఉప్పొంగిపోతున్నాను.
మను: మన క్రీడాకారులు ఇక్కడ రాణిస్తున్నారు సర్.
మోదీ: రజతం చేజారినప్పటికీ.. మీరు మన దేశం పేరును నిలబెట్టారు. మీకు రెండు విధాలా క్రెడిట్ దక్కుతోంది. ఒకటి కాంస్యం సాధించడం. రెండు.. ఈ విభాగంలో పతకం తీసుకొచ్చిన తొలి మహిళ మీరే కావడం.
మను: ధన్యవాదాలు సర్..
మోదీ: టోక్యో ఒలింపిక్స్ సమయంలో మీకు పిస్టల్ హ్యాండిచ్చింది. కానీ, ఈసారి మాత్రం అన్ని లోపాలను అధిగమించారు.
మను: అవును సర్. ఇంకా మ్యాచ్ లు ఉన్నాయి. వాటిలోనూ రాణించేందుకు ప్రయత్నిస్తా.
మోదీ: నాకు పూర్తి నమ్మకం ఉంది. ప్రారంభమే ఇంత బాగుంది. దాంతో ఉత్సాహం, ఆత్మవిశ్వాసం పెరుగుతుంది. దేశానికీ పేరు వస్తుంది. తోటి క్రీడాకారులు అందరూ సౌకర్యంగానే ఉన్నారా? అక్కడ అన్ని ఏర్పాట్లు సరిగ్గానే ఉన్నాయా?
మను: అవును సర్. అందరూ ఆనందంగా ఉన్నారు. మిమ్మల్ని కూడా గుర్తు చేస్తున్నారు.
మోదీ: మన క్రీడాకారులకు అక్కడ ఎటువంటి ఇబ్బందులు లేకుండా మేం కూడా అన్ని చర్యలు తీసుకున్నాం.
మను: అన్ని బాగున్నాయి సర్. మీ ప్రయత్నాలు ఫలించాయనుకుంటా.
మోదీ: మీ అందరి శ్రమ ఫలిస్తుంది. కుటుంబ సభ్యులతో మాట్లాడారా? మీ నాన్న రామ్ కిషన్ చాలా సంతోషిస్తున్నారు కావచ్చు.. ఆయన మిమ్మల్ని చాలా ప్రోత్సహించారు.
మను: అవును సర్. అందరూ సంతోషంగా ఉన్నారు. థాంక్యూ సర్.
