పౌరసత్వం కల్పిస్తే సమస్యేంటీ?

కోల్ కతా: బంగ్లాదేశ్​ నుంచి వచ్చిన హిందువులు, బౌద్ధులకు పౌరసత్వం కల్పిస్తే సమస్య ఏంటని టీఎంసీని కేంద్రమంత్రి అమిత్​ షా నిలదీశారు. టీఎంసీకి సీఏఏలో జోక్యం చేసుకునే సత్తా, ధైర్యం రెండూ లేవని అమిత్​ షా పేర్కొన్నారు. మంగళవారం పశ్చిమ బెంగాల్​ లోని మల్దాహాలో జరిగిన ఎన్నికల ప్రచారంలో అమిత్​ షా పాల్గొన్నారు.తమ రాష్ట్రంలోకి చొరబాటుదారులు ప్రవేశించకుండా అడ్డుకోవాలని బెంగాల్ ప్రజలు కోరుకుంటుంటే సందేశ్‌ఖాలీ తరహా ఘటనలు చోటుచేసుకోకుండా ఉండాలంటే.. మోదీనే మళ్లీ ప్రధానిగా ఎన్నుకోవాలని ప్రజలకు పిలుపునిచ్చారు. గత ఎన్నికల్లో 18 సీట్లు ఇచ్చి ఆశీర్వదించారని ఈసారి మాత్రం ఆ సాంఖ్యను 35కు పెంచాలని కోరారు. అలా చేస్తే ఇక్కడి చొరబాట్లను పూర్తిగా ఆపివేస్తామని మంత్రి అమిత్​ షా స్పష్టం చేశారు. ఓటు బ్యాంకుకు అత్యధిక ప్రాధాన్యం ఇస్తున్న మమతా బెనర్జీ సందేశ్​ ఖాళీ మహిళలపై వేధింపులు వచ్చినా పట్టించుకోవడం లేదని విమర్శించారు. హైకోర్టు జోక్యంతో నిందితుడు జైల్లో ఉన్నాడని పేర్కొన్నారు. బీజేపీకి ఓటు వేస్తే టీఎంసీ రౌడీలను తలకిందులుగా వేలాడదీస్తామని షా తెలిపారు. 

కేంద్ర ప్రభుత్వం రూ.7 లక్షల కోట్లను రాష్ట్రానికి ఇచ్చిందని అమిత్​ షా తెలిపారు. ఆ నిధులన్నీ టీఎంసీ నాయకులు కాజేసి పేదల నోట్లో మట్టి కొట్టారని మండిపడ్డారు. పది సంవత్సరాలకు ముందు సైకిల్​ మీద తిరిగే వారికి కార్లు భవంతులు, కోట్ల రూపాయల వ్యాపారాలు ఎక్కడివని ప్రశ్నించారు. ఇదంతా ప్రజల సొమ్మేనన్నారు.