నేరగాళ్లను వెనక్కు పట్టుకొస్తాం

నా తెలంగాణ, న్యూ ఢిల్లీ: భారత్​ నుంచి పారిపోయిన నేరగాళ్లను వెనక్కు పట్టుకొచ్చే వరకూ విశ్రమించబోమని కేంద్ర హోంశాఖ మంత్రి అమిత్​ షా అన్నారు. మంగళవారం న్యూ ఢిల్లీలో భారత్​ పోల్​ పోర్టల్​ ను ప్రారంభించారు. ఈ పోర్టల్​ ను రూపొందించడంలో అధికారుల విశేష కృషికి అభినందనలు తెలిపారు. అనంతరం దీనికి సంబంధించిన విశిష్టతలను మీడియాకు వివరించారు. ఈ విధానం ద్వారా నేరుగా ఇంటర్​ పోల్​ తో అనుసంధానం అవుతామన్నారు. ఇక భారత్​ లో నేరం చేసి ఆయా దేశాల్లో నక్కిన నేరస్థులను పట్టుకోవడం మరింత సులభతరంగా మారనుందన్నారు. ఈ విధానంతో ప్రపంచదేశాల్లో ఎక్కడ ఉన్నా నేరస్థులను భారత్​ కు రప్పిస్తామన్నారు. ఈ విధానం ద్వారా అన్ని దర్యాప్తు సంస్థల సమాచారం ఒకే వేదికపైగా రానుందన్నారు. దీంతో సమాచారం అందజేత, ఇంటర్​ పోల్​ సహాయం, నేరస్థుల డేటా, పారిపోనీయకుండా పకడ్భందీ చర్యలు, వారిని తీసుకొచ్చే చర్యలు మరింత పటిష్టం అవుతాయన్నారు. తద్వారా నేరస్థులను త్వరగా భారత్​ కు తీసుకువస్తామన్నారు. ఈ పోర్టల్​ ద్వారా 195 దేశాలతో సమన్వయం చేసుకుంటామన్నారు. రెడ్​ కార్నర్​ నోటీసులు, రియల్​ టైమ్​ ఇంటర్​ ఫేస్​, ఆయా దేశాల చట్టాల తీర్పులు, వాటిపై సమీక్ష తదితరాల ద్వారా నేరస్థులను వేగంగా వెనక్కు రప్పిస్తామన్నారు. ఈ పోర్టల్​ లో 19 రకాల డేటాబేస్​ అందుబాటులో ఉంటుందన్నారు. డ్రగ్స్​ అక్రమ రవాణా, ఆయుధాల స్మగ్లింగ్​, మానవ అక్రమ రవాణా, దాడులు, ఆర్థిక, సైబర్​ నేరాలు వంటి సమాచారం ఉంటుందన్నారు. దీంతో దర్యాప్తు సంస్థు మరింత చురుకుగా పనిచేస్తూ సమయభావాన్ని గణనీయంగా తగ్గించగలుగతాయన్నారు. ఈ విధానం ద్వారా భారత్​ లోని అన్ని ఏజెన్సీలను ఒక నోడల్​ ఏజెన్సీగా రూపొందించి అన్ని రాష్ర్టాల పోలీసులకు శిక్షణను ఇచ్చే బాధ్యతను సీబీఐకి అప్పగించారు.