విలేఖరుల సమస్యల పరిష్కారానికి కృషి కేంద్రమంత్రి జి.కిషన్​ రెడ్డి

ఐఎఫ్​ డబ్ల్యూజే, టీడబ్ల్యూ జేఎఫ్​ వినతిపత్రం సమర్పణ

నా తెలంగాణ, హైదరాబాద్​: విలేఖరుల సమస్యలను పరిష్కరించేందుకు తనవంతు శక్తివంచన లేకుండా సహాయ సహకారాలు అందిస్తానని తెలంగాణ రాష్ర్ట బీజేపీ అధ్యక్షుడు, కేంద్ర బొగ్గు, గనుల శాఖ మంత్రి జి.కిషన్​ రెడ్డి అన్నారు. జర్నలిస్ట్​ హౌసింగ్​ సొసైటీలకు న్యాయం జరిగేలా చూస్తానన్నారు. జర్నలిస్టుల పెన్షన్​ స్కీం అమలు చేసే అంశాన్ని కేంద్ర సమాచార ప్రసారాల మంత్రితో చర్చిస్తానని హామీ ఇచ్చారు. హౌసింగ్​ సొసైటీలపై సుప్రీం తీర్పు అంశం న్యాయశాఖ పరిధిలో ఉన్నందున, ఆ శాఖ మంత్రితో మాట్లాడి సమస్య పరిష్​కరానికి తనవంతు ప్రయత్నం చేస్తానని కేంద్ర మంత్రి జి.కిషన్​ రెడ్డి స్పష్టం చేశారు.

శనివారం జర్నలిస్టుల పలు సమస్యల పరిష్​కారాన్ని కోరుతూ ఐఎఫ్​ డబ్ల్యూ జే (ఇండియన్​ ఫెడరేషన్​ ఆఫ్​ వర్కింగ్​ జర్నలిస్ట్​) జాతీయ కార్యదర్శి పులిపలుపుల ఆనందం, టీడబ్ల్యూజేఎఫ్​ (తెలంగాణ వర్కింగ్​ జర్నలిస్ట్​ ఫెడరేషన్​) రాష్ర్ట అధ్యక్షుడు మామిడి సోమయ్య, ఉపాధ్యక్షుడు ఎల్గొయి ప్రభాకర్​ తదితరులు శనివారం కేంద్రమంత్రి జి.కిషన్​ రెడ్డికి వినతిపత్రం సమర్పించారు. ఈ సందర్భంగా జర్నలిస్టు సమస్యలను కేంద్రమంత్రికి వివరించారు. పెన్షన్​, రైల్వే పాస్​ లు, ప్రత్యేక రక్షణ చట్టం, జాతీయ మీడియా కమీషన్​ ఏర్పాటు, హౌసింగ్​ సొసైటీలకు స్థలాల కేటాయింపు తదితరాలపై కేంద్రమంత్రి కిషన్​ రెడ్డి చొరవ తీసుకొని సమస్యల పరిష్కరానికి పూనుకోవాలని విజ్ఞప్తి చేశారు. ఈ సందర్భంగా కేంద్రమంత్రి జి.కిషన్​ రెడ్డి జర్నలిస్టుల సమస్యల పరిష్కారానికి సానుకూలంగా స్పందించారు. త్వరలోనే ఆయా అంశాలపై కేంద్రమంత్రులతో మాట్లాడతానని స్పష్టం చేశారు.