కారు దిగి కాంగ్రెస్​లోకి మేయర్​

 నా తెలంగాణ, హైదరాబాద్: కాంగ్రెస్ సీనియర్ నాయకుడు కే కేశవరావు తో పాటు బీఆర్ఎస్ పార్టీని వీడిన హైదరాబాద్ నగర మేయర్ గద్వాల విజయలక్ష్మి సీఎం రేవంత్​రెడ్డి సమక్షంలో శనివారం కాంగ్రెస్​ పార్టీలో చేరారు. విజయలక్ష్మీకి కండువా కప్పి సీఎం రేవంత్​ రెడ్డి సాదరంగా పార్టీలోకి ఆహ్వానించారు. శుక్రవారం రాజ్యసభ సభ్యుడు కె. కేశవరావు, కుమార్తె విజయలక్ష్మిలు బీఆర్​ఎస్​కు రాజీనామా చేసి సీఎం రేవంత్​రెడ్డిని కలిశారు. తన రాజకీయ శేష జీవితం ఇక కాంగ్రెస్​కే అంకితమని ప్రకటించిన విషయం తెలిసిందే. మరోవైపు మాజీ మంత్రి కడియంశ్రీహరి, ఆయన కుమార్తె దివ్య కూడా కాంగ్రెస్ లో చేరనున్నారు. ఆదిలాబాద్​ ఎమ్మెల్సీ పురాణం సతీష్ ​కాంగ్రెస్​ పార్టీలో చేరారు. ఈ సందర్భంగా పురాణం మాట్లాడుతూ.. బీఆర్​ఎస్​ ఇంతకాలం బానిస సంకెళ్లలో కూరుకుపోయిందని ఆరోపించారు. కేసీఆర్​ చెప్పేవన్నీ అబద్ధాలేనని, తెలంగాణ సంపదను దోచుకున్నారని ఆరోపించారు. యాదాద్రి పునర్నిర్మాణంలో రూ. 400 కోట్ల అవినీతి జరిగిందని ఆరోపించారు. కుటుంబ పాలనతో కేటీఆర్, హరీశ్​రావులు తెలంగాణ ప్రజలను పిచ్చివాళ్లని చేశారని విమర్శించారు. సీఎం రేవంత్​రెడ్డి నాయకత్వంలో తెలంగాణ రాష్ట్రానికి మంచి రోజులు వస్తాయని ఆకాంక్షించారు. మరోవైపు బీఆర్ ఎస్​ పార్టీ ఎమ్మెల్యే కాలేరు వెంకటేశ్​కూడా కారు దిగి హస్తాన్ని అందుకోనున్నట్లు తెలుస్తోంది. ఇప్పటికే ఆయన కాంగ్రెస్​ నేతలతో ఆ దిశలో ప్రయత్నాలు సాగిస్తున్నారని తెలుస్తోంది. ఆదివారం తన ముఖ్య కార్యకర్తలతో సమావేశం ఏర్పాటు చేసి పార్టీ మార్పిడిపై ప్రకటిస్తారని తెలుస్తోంది.