వ్యవసాయ రంగంలో సాంకేతికత వినియోగించాలి

భువనేశ్వర్: వ్యవసాయ రంగంలో అత్యాధునిక సాంకేతిక పరిజ్ఞానం ఉపయోగించాలని రాష్ట్రపతి ద్రౌపది ముర్మూ వ్యవసాయ శాస్త్రవేత్తలుకు పిలుపునిచ్చారు. గురువారం భువనేశ్వర్​ లోని ఒడిశా యూనివర్సిటి ఆఫ్​ అగ్రికల్చర్​ అండ్​ టెక్నాలజీ 40వ స్నాతకోత్సవంలో పాల్గొని ప్రసంగించారు. ప్రకృతి వైపరీత్యాలు, వాతావరంలోని మార్పులు, సహజ వనరుల నుంచి రైతులను రక్షించాల్సిన అవసరం ఉందన్నారు. ఇందుకు శాస్త్రవేత్తలు నూతన ప్రణాళికలను రూపొందించాలన్నారు. అత్యాధునిక డ్రోన్​ టెక్నాలజీ, రిమోట్​ సెన్సింగ్​, ఆర్టిఫిషియల్​ ఇంటలిజెన్స్​, నానో టెక్నాలజీని వ్యవసాయ రంగంలో ఉపయోగించి సాధికారత దిశగా ముందుకు వెళ్లాలన్నారు. భూసారం పరిరక్షణ, సహజ వనరుల సక్రమ వినియోగంపై దృష్టి సారించాలన్నారు. గత కొన్ని దశాబ్దాల్లో భారత్​ వ్యవసాయ రంగంలో అద్భుతమైన వృద్ధిని సాధించిందని, ఇతర దేశాలకు ఆహారధాన్యాలు, వ్యవసాయ పరికరాలను ఎగుమతులు చేస్తోందని హర్షం వ్యక్తం చేశారు. భారత్​ వ్యవసాయ రంగంలో పాటిస్తున్న అత్యాధునిక సాంకేతికత వల్ల వ్యవసాయ రంగం మరింత బలోపేతం అవుతుందన్నారు. 2047 వరకు భారత్​ వ్యవసాయం, వ్యవసాయదారుల అభివృద్ధి లక్ష్యాన్ని కూడా చేరుకుంటుందని రాష్ట్రపతి ద్రౌపది ముర్మూ విశ్వాసం వ్యక్తం చేశారు.