వైఫల్యం నుంచే విజయం
Success comes from failure
ప్రధాని నరేంద్ర మోదీ
యువత రాజకీయాల్లోకి రావాలి
రాష్ట్రపతి ఆలోచనతోనే పీఎం జన్మన్ యోజన
నా తెలంగాణ, న్యూ ఢిల్లీ: తనకు జీవితం, మృత్యువు అనే ఆలోచనలు ఎప్పుడూ లేవని ప్రధాని నరేంద్ర మోదీ అన్నారు. రాజకీయాలను చెడ్డవిగా భావించొద్దని విజ్ఞప్తి చేశారు. నీతి నిజాయితీ కలిగిన యువత రాజకీయాల్లోకి వచ్చి మార్పు తీసుకువచ్చే ప్రయత్నం చేయాలన్నారు. మనిషి వైఫల్యం నుంచే విజయం దిశగా అడుగులు వేస్తాడని గుర్తుంచుకోవాలన్నారు. వైఫల్యాలే తమ విజయానికి తొలిమెట్టుగా భావించి ప్రయత్నాలను ఏనాడూ వదలుకోవద్దన్నారు. రాష్ర్టపతి ద్రౌపదీ ముర్మూ సహకారం, ఆలోచనతోనే పీఎం జన్మన్ యోజన పథకాన్ని రూపొందించానని ప్రధాని నరేంద్ర మోదీ వివరించారు.
గురువులను గౌరవించడం సంతోషం..
శుక్రవారం ప్రధాని మోదీ మీడియాతో మాట్లాడారు. భావజాలం కంటే ఆదర్శవాదం ఎంతో ముఖ్యమని అన్నారు. గాంధీ, సావర్కర్ ల భావజాలం, స్వేచ్ఛా మార్గాలు వేరని అన్నారు. వీరిద్దరూ దేశాన్ని ప్రత్యేకంగా చూడాలనుకునే వారన్నారు. తన భావజాలం కూడా ప్రపంచదేశాల్లో భారత్ ను ప్రత్యేకంగా నిలపాలన్నదే తన ప్రయత్నం అన్నారు. పాత విషయాలను గుర్తుంచుకుంటూనే కొత్త వాటిని స్వీకరించాలని, సవాళ్లను అధిగమించాలని పిలుపునిచ్చారు. తాను ఎమ్మెల్యే, సీఎం, పీఎం అవుతానని ఎన్నడూ అనుకోలేదని, తన పని తాను చేసుకుంటూ పోయానన్నారు. తన జీవితంలో అత్యంత మధుర క్షణాలు గురువులను గౌరవించుకోవడం అని తెలిపారు.
వైఫల్యం నాదీ.. విజయం మీదే..
చిన్నతనంలోనే ఇంటిని వీడి అనేక కష్టనష్టాలకోర్చి ఈ స్థాయికి ఎదిగానని అన్నారు. ఇప్పుడు కూడా తాను పీఎంగా మాట్లాడటం లేదని ఒక సామాన్య పౌరుడిగా మాత్రమే మీదో సంభాషిస్తున్నానని తెలిపారు. చంద్రయాన్ –2 మిషన్ పై వెళ్లవద్దని అధికారులు కోరారన్నారు. అయినా తాను వెళ్లానని ఆ మిషన్ వైఫల్యం చెందిందన్నారు. రాత్రంతా నిద్దుర పట్టలేదన్నారు. ఉదయం 7గంటలకే శాస్ర్తవేత్తలను పిలిపించి మాట్లాడానని తెలిపారు. మీరు ప్రయత్నిస్తూనే ఉండాలని వైఫల్యాలు ఉంటే అవి తనవని విజయాలుంటే అవి మీవేనని వారిని ప్రోత్సహించానని అన్నారు. వైఫల్యాలే విజయాలకు తొలిమెట్టని దేశ ప్రజలకు మరోమారు చెబుతున్నానని మోదీ స్పష్టం చేశారు.
దేశాభివృద్ధి రాజకీయాలతోనే సాధ్యం..
దేశం మరింత అభివృద్ధిని సాధించాలంటే యువత రాజకీయాల్లోకి అడుగిడాల్సిన అవసరం ఎంతైనా ఉందన్నారు. మంచి ఆలోచనలున్న యువత రాజకీయాల్లోకి వస్తేనే ప్రక్షాళన సాధ్యమన్నారు. ఆసక్తి ఉన్న యువత రాజకీయాల్లోకి వచ్చేందుకు ప్రయత్నిస్తూనే ఉండాలని ప్రధాని మోదీ విజ్ఞప్తి చేశారు. దేశ యువతకు, కొంతమందికి రాజకీయాలంటేనే ‘చెడు’ అనే అభిప్రాయం ఉందని, కానీ అది పూర్తిగా తప్పు అన్నారు. ఈ రోజు దేశం సాధిస్తున్న అభివృద్ధి వెనుక అవే రాజకీయాలు ఉన్నాయని మరువరాదన్నారు. ఒకవేళ ఏవైనా నిర్ణయాలు తప్పుగా భావిస్తే వాటిని తిప్పికొట్టేందుకు యువత రాజకీయాల్లోకి రావాల్సిన అవసరం ఎంతైనా ఉందని ప్రధాని మోదీ అన్నారు.
