రియల్ మోసాలపై కఠిన చర్యలు
కొనుగోలుదారులు జాగ్రత్త వహించాలి జిల్లా ఎస్పీ ఉదయ్ కుమార్ రెడ్డి
నా తెలంగాణ, మెదక్: ప్రజలను మోసం చేస్తున్న రియల్ ఎస్టేట్ మాఫియా పై కఠిన చర్యలు తీసుకుంటామని మెదక్ జిల్లా ఎస్పీ ఉదయ్ ఉమార్ రెడ్డి (ఐపీఎస్) అన్నారు. ఆదివారం జిల్లా పోలీస్ ప్రధాన కార్యాలయంలో ఎస్పీ మీడియాతో మాట్లాడారు. హైదరాబాద్ చుట్టుపక్కల ఉన్న భూములకు భారీ డిమాండ్ ఉందన్నారు. చాలామంది ఇంటిస్థలం కొనుగోలు ఆసక్తి చూపిస్తుండడంతో సామాన్యుల అమాయకత్వమే వ్యాపారస్తుల ఆదాయవనరుగా మారుతోందన్నారు. ప్రజలు తగిన జాగ్రత్తలు తీసుకొని ఒకటికి రెండుసార్లు ధృవపత్రాలు సరైనవో కాదో? విచారించి కొనుగోళ్లు చేపట్టాలన్నారు. పలువురు రియల్ మోసాలపై తమకు ఫిర్యాదులు అందాయన్నారు. వారిపై కఠిన చర్యలు తప్పవని హెచ్చరించారు. శంకరంపేటలో రియల్ ఎస్టేట్ పేరిట మోసాలకు పాల్పడుతున్న పలువురిని అరెస్టు చేశామన్నారు. సామాజిక మాధ్యమాల్లో పోస్టులపై అప్రమత్తంగా ఉండాలని తెలిపారు. కూకట్పల్లికి చెందిన బాధితురాలు ఇలాగే మోసపోయిందన్నారు. మోసంచేసిన ఏడుగురిపై కేసులు నమోదు చేసి అరెస్టు చేసి కోర్టులో హాజరుపరిచి జైలుకు తరలించామన్నారు.
