ఐఫోన్ లపై స్పైవేర్ అటాక్
91 దేశాల యూజర్లకు యాపిల్ హెచ్చరిక అప్రమత్తంగా ఉండాలని మెయిల్
న్యూఢిల్లీ: యాపిల్ ఐఫోన్ లపై పెగాసస్ స్పైవేర్ మాల్ వేర్ ద్వారా హ్యాక్ చేయవచ్చునని గురువారం హెచ్చరిక జారీ చేయడం కలకలం రేపుతోంది. 91 దేశాలకు సంబంధించిన ఐఫోన్ వినియోగదారులకు మెయిల్ ల ద్వారా ఈ హెచ్చరికలను పంపింది. 'మెర్సెనరీ స్పైవేర్' ద్వారా ఐఫోన్ వినియోగదారులను లక్ష్యంగా చేసుకుంటున్నారని యాపిల్ మెయిల్ లో హెచ్చరించింది.
ఈ స్పైవేర్ ఇజ్రాయెల్ కు చెందిన ఎస్ఎస్వో గ్రూప్ పెగాసస్ లాంటిదేనని పేర్కొంది. ఫోన్ హ్యాక్ కు గురైతే విలువైన సమాచారం బయటకు వెళ్లే అవకాశం లేకపోలేదని పేర్కొంది. ఈ హెచ్చరికను ఐఫోన్ వినియోగదారులు సీరియస్ గా తీసుకోవాలని వివరించింది. భద్రతాపరంగా అత్యంత కట్టుదిట్టమైన యాపిల్ సంస్థ ఐఫోన్ నే హ్యాకర్లు దాడి చేశారంటే అది మామూలు విషయం కాదని, హ్యాకర్లు పూర్తి పరిజ్ఞానాన్ని కలిగి ఉన్నారని, అదే సమయంలో అత్యాధునిక సాంకేతికతను వినియోగిస్తున్నారనే సమాచారం సంస్థ వద్ద ఉందని నిపుణులు పేర్కొన్నారు. అయితే ఫోన్ హ్యాకింగ్ లకు కూడా భారీ ఎత్తునే హ్యాకర్లు ఖర్చు చేస్తారని వారు వివరించారు.
