పర్యావరణ అభివృద్ధికి తొలి ప్రాధాన్యం
రీ ఇన్వెస్ట్ గ్లోబల్ సమ్మిట్ –2024లో ప్రధాని మోదీ
పారిస్ లక్ష్యాన్ని 9యేళ్లముందే సాధించాం
3 లక్షల ఇళ్లపై సోలార్ ఫలకల ఏర్పాటు
రాబోయే పదేళ్లలో సోలార్ సిటీలుగా 17 నగరాలు
మూడురోజుల సదస్సులో 140 దేశాల నుంచి 10వేలమంది ప్రతినిధులు హాజరు
నా తెలంగాణ, న్యూ ఢిల్లీ: పర్యావరణ హితంగా అభివృద్ధికి ప్రభుత్వం నిబద్ధతతో పనిచేస్తుందని ప్రధాని నరేంద్ర మోదీ పునరుద్ఘాటించారు. సోమవారం గుజరాత్ లోని గాంధీనగర్ లో మహాత్మా మందిర్ లో రీ ఇన్వెస్ట్ గ్లోబల్ మీట్ –2024 కార్యక్రమాన్ని ప్రారంభించి సూర్యఘర్ ముఫ్త్ బిజిలీ యోజనను జాతికి అంకితం చేశారు.
అనంతరం ప్రధాని మోదీ మాట్లాడుతూ.. పారిస్ లో నిర్దేశించిన వాతావరణ కట్టుబాట్లను లక్ష్యానికి తొమ్మిదేళ్ల ముందు భారత్ సాధించిందన్నారు. దేశం హరితంలో పరివర్తనను ఉద్యమంలా మార్చిందని మోద తెలిపారు. పీఎం సూర్యఘర్ తో ప్రతీ ఇంటిని విద్యుత్ ఉత్పత్తిదారునిగా మార్చే బృహత్తర కార్యక్రమాన్ని చేపట్టామన్నారు. ఈ పథకం ద్వారా 3 లక్షల ఇళ్లపై సోలార్ ఫలకలు ఏర్పాటు చేశామన్నారు. ఈ రంగంలో యువతకు పుష్కలమైన అవకాశాలు లభిస్తున్నాయని మోదీ పేర్కొన్నారు. యువతకు ఈ రంగంలో మరింత నైపుణ్యతను అందించేందుకు కేంద్ర ప్రభుత్వం నిబద్ధతతో పనిచేస్తుందని తెలిపారు.
దేశంలో 17 నగరాలను సోలార్ సిటీగా అభివృద్ధి చేసేందుకు కేంద్ర ప్రభుత్వం ప్రణాళికలను రూపొందించిందన్నారు. పదేళ్లలో గ్రీన్ హైడ్రోజన్ తో స్వచ్ఛమైన ఇంధన ఉత్పత్తి రంగాలలో విజయాలను సాధిస్తామని ధీమా వ్యక్తం చేశారు. ఈ రంగంలో ఎదుగుతున్న భారత్ లో పెట్టుబడులు పెట్టాలని వ్యాపారులకు పిలుపునిచ్చారు.
ఎనర్జీ రంగంలో భారత్ గణనీయమైన వృద్ధిని సాధిస్తుందని కేంద్ర ఇంధన శాఖ మంత్రి ప్రహ్లాద్ జోషి అన్నారు. 86 శాతం వృద్ధిని నమోదు చేసింది. పునరుత్పాదక ఇంధన రంగంలో గుజరాత్ ను అగ్రగామిగా మార్చనున్నట్లు సీఎం భూపేంద్ర పటేల్ ప్రకటించారు.
మూడు రోజులపాటు జరిగే ఈ సదస్సులో 40 సెషన్ లు ఉండనున్నాయి. ఇందులో ఫైనాన్సింగ్, గ్రీన్ హైడ్రోజన్, భవిష్యత్ ఇంధన అవసరాలు, సమస్యలు, పరిష్కారాలు వంటి వాటిపై చర్చించనున్నారు. ఈ సదస్సులో పాల్గొనేందుకు 140 దేశాల నుంచి 10వేల మంది ప్రతినిధులు హాజరవుతున్నారు. కార్యక్రమం ప్రారంభించిన అనంతరం ప్రధానమంత్రి నరేంద్ర మోదీ తొలుత సూర్యఘర్ ద్వారా లబ్ధి పొందిన వారితో మాట్లాడారు.
