స్పైడర్ అటాక్.. నక్సల్స్ కు భారీ నష్టం
Spider attack.. Heavy loss to Naxals
గతంకంటే భిన్నమైన ఆపరేషన్
తొలిసారిగా భారీ ఆపరేషన్ కు దుర్గా, దంతేశ్వరీ మహిళా దళాలు
12కిలోల బ్యాగు, రోజువారి అన్నపానీయాల బరువుతో 40కి.మీ. కాలినడక
అమావాస్య చీకట్లు, కురుస్తున్న భారీ వర్షంలోనూ వెరవని మహిళా సైనికులు
నా తెలంగాణ, సెంట్రల్ డెస్క్: సాలీడు ( స్పైడర్)వ్యూహాంతో నక్సల్స్ కు భద్రతా బలగాలు భారీ నష్టాన్ని చేకూర్చాయి. దీనికి తోడు అమావాస్య చీకట్లు, వర్షం లాంటి వాతావరణ పరిస్థితులు కూడా భద్రతా బలగాలకు అనుకూలంగా మారాయి. మరోవైపు ఈ దాడుల్లో తొలిసారిగా మహిళా ఆర్మీ దళాలను రంగంలోకి దింపారు. దుర్గా, దంతేశ్వరి దళాలు నక్సల్స్ వ్యతిరేక ఆపరేషన్ లో విజయవంతమయ్యాయి. భుజంపై 12 కిలోల రైఫిల్ బరువుతోపాటు రోజువారీ అన్నపానీయాల సంచులను మోసుకుంటూ కొండాకోనలు, అసలు దారులే లేని ప్రాంతాల్లో ఈ దళాలు 40కి.మీ. కాలినడక వెళ్లారు. కారుచీకట్లలో నైట్ విజన్ కెమెరాతో ఎక్కడా ఆగకుండా ముందుకు సాగారు. ఆపరేషన్ ను పూర్తిచేసుకొని సురక్షితంగా తిరిగి వచ్చాయి.
ఏమిటీ సాలీడు వ్యూహం..
పేరు చెప్పేందుకు ఇష్టపడని ఓ ఆర్మీ అధికారి ఈ వ్యూహం గురించి తెలిపారు. సాధారణంగా ఒక సమాచారం వస్తే అదీ సరైందా? లేదా? ముందుగా నిర్ధరించుకోవడం ఒక ఎత్తు. ఒకవేళ సైనికులు ఆ ప్రాంతానికి వెళ్లి సమాచారం సరైంది కాకుంటే నక్సల్స్ ఉచ్చులో చిక్కుకునే ప్రమాదం ఉంది. మరోవైపు నక్సల్స్ ఎక్కువగా యూ, వై, వీ ఆకారాల వ్యూహాలతోనే దాడులకు దిగుతుంటారు. వీటిని అడ్డుకుంటూ సమర్థవంతంగా దాడి చేయడమే తమకు సవాల్ గా నిలిచేది. అయితే ఇతర వ్యూహాల్లో భద్రతా బలగాల వైపు కూడా నష్టం ఎక్కువగా ఉండే ఆస్కారం ఉంటుంది. దీంతో సాలీడు వ్యూహాన్ని అనుసరించడమే ఉత్తమమని నిర్ణయించాం. ఈ వ్యూహం ప్రకారం సాలీడు గూడు పెట్టిన దారాల మాదిరిగా అన్ని వైపుల నుంచి చుట్టుముట్టడం తొలి వ్యూహం. ఆ తరువాత నక్సల్స్ తప్పించుకోకుండా దాడి చేయడం వ్యూహాంలో తరువాయి అంకమని వివరించారు. ఈ వ్యూహాంలో అపజయం అనేది ఉండదన్నారు. కాకపోతే సైనిక బలగమే పెద్ద యెత్తున అవసరం అవుతుందన్నారు. ఇదే వ్యూహాన్ని వినియోగించి సమయం ఎక్కువైనా నక్సల్స్ ను సమర్థవంతంగా చుట్టుముట్టామని తెలిపారు. ఈ వ్యూహాంలో నష్టం ఉండదన్నారు.
ఏది ఏమైనా 31 మంది నక్సల్స్ మృతి చెందడం వారికి భారీ నష్టాన్ని కలగజేసిందని చెప్పొచ్చు. ఇక దండకారణ్యంలో సమావేశాలంటేనే భయపడే స్థాయిలో ఈ ఆపరేషన్ కొనసాగడం విశేషం. మృతిచెందిన నక్సలైట్లలో మొత్తం రూ. 1.60 కోట్ల రివార్డు ప్రకటించిన వారు ఉన్నారు.
