కనెక్టివిటీలో వేగం
చర్లపల్లి రైల్వే స్టేషన్ లో కేంద్రమంత్రి జి.కిషన్ రెడ్డి
- 98 శాతం పనులు పూర్తి
- వచ్చే నెలలో ప్రారంభం
- త్వరలో యాదాద్రి మెట్రో పనులు ప్రారంభం
- కొమురవెళ్లి స్టేషన్ ఏర్పాటు
- దక్షిణాదిలో సికింద్రాబాద్ స్టేషన్ అత్యాధునికం
- చర్లపల్లి రోడ్ల విస్తరణకు ప్రభుత్వానికి విజ్ఞప్తి
- పెడచెవిన పెట్టిన బీఆర్ఎస్
- యుద్ధప్రాతిపదికన విస్తరణ పనులకు ప్రభుత్వం హామీ
నా తెలంగాణ, హైదరాబాద్: ప్రధాని మోదీ ప్రభుత్వం తెలంగాణలో కనెక్టివిటీ వేగవంతానికి అనేక చర్యలు తీసుకుందని తెలంగాణ రాష్ర్ట బీజేపీ అధ్యక్షుడు, కేంద్ర బొగ్గు, గనుల శాఖ మంత్రి జి.కిషన్ రెడ్డి అన్నారు. స్వాతంత్ర్యం వచ్చినప్పటి నుంచి రైల్వేలకు జరిగిన నష్టాన్ని ప్రధాని నరేంద్ర మోదీ వేగవంతంగా పూడ్చే పనిలో ఉన్నారని తెలిపారు. ఇందులో భాగంగానే చర్లపల్లి, సికింద్రాబాద్, నాంపల్లి, కాచిగూడ, యాదాద్రి మెట్రోలైన్, కొమురవెల్లికి ప్రత్యేక రైల్వే స్టేషన్ లాంటి అభివృద్ధి కార్యక్రమాలకు పచ్చజెండా ఉపారని కేంద్రమంత్రి ప్రధాని మోదీకి ధన్యవాదాలు తెలిపారు.
ఆదివారం మంత్రి జి.కిషన్ రెడ్డి చర్లపల్లి రైల్వే స్టేషన్ ను సందర్శించి జరిగిన పనులపై అధికారులతో ఆరా తీశారు. స్టేషన్ మొత్తం కలియదిరిగి ఏ మేరకు పనులు జరిగాయి? ఇంకా ఏ మేరకు జరగాల్సి ఉంది? అనే విషయాలపై అధికారులను వివరాలు అడిగి తెలుసుకున్నారు.
సకల సౌకర్యాలతో..
అనంతరం మీడియాతో మాట్లాడారు. చరపల్లి టెర్మినల్ పునర్ నిర్మాణానికి రూ. 430 కోట్లు ఖర్చు చేశామని తెలిపారు. ప్రస్తుతం 98 శాతం పనులు పూర్తయ్యాయని చెప్పారు. వచ్చె నెలఖరు వరకు ప్రయాణికులకు ఈ స్టేషన్ ను అందుబాటులోకి తీసుకువస్తామని మంత్రి వివరించారు. ఈ రైల్వే స్టేషన్ లో అత్యాధునిక సౌకర్యాలతో మహిళలు, వృద్ధులు, దివ్యాంగులు, పిల్లలకు అన్ని రకాల సదుపాయాలను ఏర్పాటు చేశామన్నారు. ఎస్కలేటర్లు, లిఫ్టులు, రెస్ట్ రూమ్ లు, వెయిటింగ్ రూమ్ లు, భద్రతా లాంటి అన్ని రకాల సౌకర్యాలను కల్పించామన్నారు.
ఓఆర్ఆర్ ద్వారా చర్లపల్లికి..
చర్లపల్లి టెర్మినల్ అందుబాటులోకి వస్తే ప్రధానంగా సికింద్రాబాద్ రైల్వే స్టేషన్ వద్ద ట్రాఫిక్ తగ్గుతుందన్నారు. ఓఆర్ ఆర్ ద్వారా చర్లపల్లికి త్వరగా చేరుకోవచ్చన్నారు. అదే సమయంలో చర్లపల్లికి దారి తీసే రహదారులపై గతంలో బీఆర్ఎస్ ప్రభుత్వానికి లేఖ రాసినా స్పందించలేదన్నారు. ప్రస్తుత ప్రభుత్వంతో రహదారుల విస్తరణపై మాట్లాడానని తెలిపారు. భరత్ నగర్ 80 అడుగుల రోడ్డు విస్తరణ, మహాలక్ష్మి వైపు 80 అడుగులు, ఇండస్ర్టీయల్ వైపు 100 ఫీట్ల రోడ్లు ఉండాలని ప్రభుత్వాన్ని కోరామన్నారు. ప్రభుత్వం ఇందుకు పూర్తిసన్నద్ధతను వ్యక్తం చేసిందని అందుకు సంబంధించిన పనులు కూడా మొదలుపెడతామని మంత్రి తెలిపారు. ఈ రైల్వే స్టేషన్ లో 20 రైళ్లను నిలిపే సదుపాయం ఉందన్నారు. భవిష్యత్ లో గూడ్స్ రైళ్ల ద్వారా ఇక్కడి నుంచే ట్రాన్స్ పోర్టింగ్, లోడింగ్, అన్ లోడింగ్ ను దృష్టిలో ఉంచుకొని అన్ని సౌకర్యాలను ఏర్పాటు చేశామన్నారు.
గ్రీనరీకి అధిక ప్రాధాన్యం..
ఈ రైల్వే స్టేషన్ లో పర్యావరణ హిత చర్యలు తీసుకున్నామని మంత్రి కిషన్ రెడ్డి వివరించారు. చర్లపల్లి స్టేషన్ ఆధునికత, పునరుద్ధరణ ద్వారా 500 చెట్లను రీ లొకేట్ చేశామన్నారు. ఇందుకు ప్రతీకా 5500 చెట్లను పెంచాలని నిర్ణయించామన్నారు. దీంతోపాటు అన్ని ప్రధాన రైల్వే స్టేషన్లలో 3000 మొక్కలు నాటి వాటన్నింటికీ రెయిన్ హార్వెస్టింగ్ ద్వారా రక్షించాలని నిర్ణయించినట్లు తెలిపారు. చర్లపల్లి లో సివరేజీ ప్లాంట్ ను కూడా ఏర్పాటు చేశామని తెలిపారు. చర్లపల్లిలో ఎలక్ర్టిక్ చార్జీంగ్ 12 పాయింట్లను ఏర్పాటు చేస్తామని తెలిపారు.
అమృత్ కింద ఆధునీకత..
మోదీ ప్రభుత్వం అమృత్ పథకం కింద తెలంగాణలో 40 చిన్న రైల్వే స్టేషన్లను అభివృద్ధి చేస్తుందని తెలిపారు. స్థానిక సంస్కృతి, సాంప్రదాయాలకు ప్రతిబింబించేలా ఆధునికతతో వీటి పనులు కొనసాగుతున్నాయని తెలిపారు. తెలంగాణలో 346 కి.మీ. కొత్త రైల్వే లైన్లు ఏర్పాటు, 369 కి.మీ. సింగిల్, డబ్లింగ్, ట్రిపులింగ్ లను చేశామన్నారు. సికింద్రాబాద్ రైల్వే స్టేషన్ లో 110 కిలోవాట్స్ వందశాతం విద్యుత్ వినియోగం సోలార్ పవార్ తోనే వినియోగించుకునేలా ఏర్పాట్లు చేశామని తెలిపారు.
యాదాద్రికి ఎంఎంటీఎస్..
భక్తుల సౌకర్యార్థం యాదాద్రికి ఎంఎంటీఎస్ ను ఏర్పాటు చేయనున్నామని తెలిపారు. త్వరలోనే ఈ పనులు కూడా చేపడతామన్నారు. కొమురవెల్లి మల్లనను దర్శించుకునే భక్తుల కోసం కూడా మోదీ ప్రభుత్వం రైల్వే స్టేషన్ ను నిర్మాణం చేపట్టిందన్నారు. ఇక్కడికి కూడా త్వరలో రైళ్లను ఏర్పాటు చేయనున్నట్లు తెలిపారు.
176 రైల్వే స్టేషన్ లలో ఫ్రీ హై స్పీడ్ వైఫై..
రైల్వే క్రాసింగ్ లు, ఆర్ యూబీలు, అండర్ గ్రౌండ్ బ్రిడ్జిలు, ఫుట్ ఓవర్ బ్రిడ్జిల నిర్మాణం ఇలా అనేక కార్యక్రమాలు ఇప్పటికే పూర్తయ్యాయని మంత్రి వివరించారు. ప్రయాణికుల భద్రత కోసం సీసీ కెమెరాలను కూడా ఏర్పాటు చేశామన్నారు. తెలంగాణలోని 176 రైల్వే స్టేషన్లలో హై స్పీడ్ ద్వారా వైఫై సౌకర్యం కల్పిస్తున్నామని తెలిపారు. కొన్ని రైల్వే స్టేషన్లలో 86 స్థానిక ఉత్పత్తుల స్టాల్స్ ను ఏర్పాటు చేశామన్నారు. దీంతో స్వయం సహాయక సంఘాల మహిళలకు ఆర్థిక స్వాతంత్ర్యం లభించేలా ప్రోత్సహిస్తున్నామన్నారు.
