పాక్​ లో ఎల్పీజీ ట్యాంకర్​ పేలి ఆరుగురు మృతి

31మందికి గాయాలు, 13మంది పరిస్థితి విషమం

ఇస్లామాబాద్​: పాక్​ లో ఎల్పీజీ ట్యాంకర్​ పేలి ఆరుగురు మృతి చెందారు, 31 మందికి గాయాలయ్యాయి. సోమవారం జరిగిన ఈ ప్రమాద వివరాలను స్థానిక పోలీసు ఉన్నతాధికారి సాదీక్​ అలీ మీడియాకు వివరించారు. 

పంజాబ్​ ప్రావిన్స్​ ముల్తాన్ హమీద్​ పుర్​ కనౌరా పారిశ్రామిక ప్రాంతంలో ఎల్పీజీ ట్యాంకర్​ పేలిందని సమాచారం అందిందన్నారు. వెంటనే సంఘటనా స్థలానికి చేరుకొని స్థానికులను ఆ ప్రాంతం నుంచి దూరంగా తరలించామన్నారు. గాయపడ్డవారిని స్థానికంగా ఉన్న ముల్తాన్​ ఆసుపత్రికి చికిత్స కోసం తరలించామన్నారు. ఈ ప్రమాదంపై దర్యాప్తు చేపట్టాల్సి ఉందన్నారు. రెస్క్యూ చర్యలు కొనసాగుతున్నాయని తెలిపారు. ఈ ప్రమాదంలో 20 ఇల్లు కూడా పూర్తిగా ధ్వంసం కాగా, 70 ఇళ్లు పాక్షికంగా దెబ్బతిన్నాయని, పలు జంతువులు కూడా ప్రమాదంబారిన పడి మృతి చెందాయన్నారు. ట్యాంకర్​ పేలడంతో పెద్ద ఎత్తున శిథిలాలు నివాస ప్రాంతాలపై పడడంతో భారీ నష్టం వాటిల్లిందని తెలిపారు. 10 ఫైరింజన్లతో మంటలను అదుపులోకి తీసుకువచ్చామని తెలిపారు. ట్యాంకర్​ లోని గ్యాస్​ వాల్వ్​ నుంచి లీకేజీ ఏర్పడిందని స్థానికులు సమాచారం అందించారని దీంతో వారంతా దూరంగా వెళ్లిపోవడంతో పెను ప్రమాదం తప్పిందన్నారు. గాయపడిన వారిలో 13 మంది పరిస్థితి విషమంగా ఉందని పోలీసు అధికారి సాదీక్​ అలీ ప్రకటించారు.