చిన్నారులపై లైంగిక దాడి మహారాష్ట్రలో ఆందోళనలు

పలు లోకల్​ రైళ్ల రద్దు, రాళ్ల దాడులు
నిందితునిపై పోక్సో కింద కేసు నమోదు
ఉన్నతస్థాయి విచారణకు డిప్యూటీ సీఎం ఫడ్నవీస్​ ఆదేశం

ముంబై: మహిళలు, బాలికలు, చిన్నారులపై రోజురోజుకు లైంగిక దాడులు పెరిగిపోతున్నాయి. కోల్​ కతా దాడి ఓ వైపు తీవ్ర ఆందోళన రేకెత్తిస్తుండగా మహారాష్ర్టలోని ముంబై బద్లాపూర్​ పాఠశాలలో బాలికలపై లైంగిక వేధింపుల కేసు ఆలస్యంగా వెలుగుచూసింది. అయితే ఈ కేసులోనూ పోలీసులు, పాఠశాల, అధికారుల నిర్లక్ష్యం ఉదంటూ పెద్ద ఎత్తున నిరసనలు, ఆందోళనలు చెలరేగి ఏకంగా రైళ్లు నిలిపే వరకూ, రాళ్ల దాడుల వరకు వెళ్లడంతో విషయం మీడియాకు పొక్కింది. 

వివరాల్లోకి వెళితే..

మహారాష్ర్ట థానేలోని బద్లాపూర్​ పాఠశాలలో ఆగస్ట్​ 12న లైంగిక దాడి ఘటన జరిగింది. ఆగస్టు 17న స్కూల్ అటెండర్‌ను పోలీసులు అరెస్ట్ చేశారు. కిండర్ గార్టెన్‌లో చదువుతున్న మూడు, నాలుగేళ్ల వయసున్న ఇద్దరు బాలికలను వేధిస్తున్నాడని ఆ వ్యక్తిపై ఆరోపణలు వచ్చాయి. బాలికల కుటుంబ సభ్యులు ఇచ్చిన ఫిర్యాదు మేరకు పాఠశాల మరుగుదొడ్డిలోనే అటెండర్ బాలికలను వేధించాడని తెలిసింది. ఈ విషయాన్ని బాలికలు తమ తల్లిదండ్రులకు చెప్పారు. అనంతరం ఈ ఘటనపై ఫిర్యాదు నమోదు చేసి నిందితులపై పోక్సో సెక్షన్ల కింద కేసు నమోదు చేశారు. అనంతరం అరెస్టు చేశారు. ఈ ఘటనపై స్కూల్ యాజమాన్యం ఓ ప్రకటన విడుదల చేస్తూ ప్రిన్సిపాల్‌తో పాటు క్లాస్ టీచర్‌, మహిళా అటెండర్‌ను కూడా సస్పెండ్ చేస్తూ చేతులు దులుపుకుంది. 

తల్లిదండ్రులు కఠిన చర్యలకు డిమాండ్​ చేస్తున్నా ఓ వైపు పోలీసులు, పాఠశాల యాజమాన్యం నిర్లక్ష్యంగా వ్యవహరించడంతో తల్లిదండ్రులు, చుట్టుపక్కలు, పలు సంఘాలతో మమేకమై మంగళవారం ఉదయం పెద్ద ఎత్తున పాఠశాల వద్ద ఆందోళనకు దిగారు. ఉదయం మహారాష్ర్టలోని పలు రైల్వే ట్రాక్​ లపై బైఠాయించారు. పెద్ద ఎత్తున నిరసనకారులు చేరుకోవడంతో పోలీసులు వారిని అక్కడి నుంచి చెదరగొట్టేందుకు లాఠీలు ఝాళిపించారు. దీంతో రెచ్చిపోయిన నిరసనకారులు రాళ్లదాడులకు పాల్పడ్డారు. ఈ ఆందోళనలతో పలు రైళ్లు కూడా రద్దయ్యాయి. 

ప్రభుత్వం సీరియస్​..

లైంగికదాడి ఆరోపణలపై ప్రభుత్వం దృష్టికి రావడంతో సీరియస్​ గా స్పందించింది. వెంటనే ఘటనపై నిష్పక్షపాత విచారణకు ఉపముఖ్యమంత్రి ఫడ్నవీస్​ సిట్​ విచారణకు ఆదేశించారు. నిందితులపై కఠిన శిక్షలు పడేల కేసును ఫాస్ట్​ ట్రాక్​ కోర్టుకు తీసుకువెళ్లాలని థానే పోలీస్​ కమిషనర్​ ను ఆదేశించారు.