ఏడో విడతలో 8 రాష్ట్రాల్లోని 57 స్థానాల్లో పోలింగ్​

నా తెలంగాణ,సెంట్రల్​ డెస్క్​: దేశవ్యాప్తంగా చివరి విడత ఎంపీ ఎన్నికలు ఏడో విడత జూన్​ 1న జరగనున్న విషయం తెలిసిందే. చివరి విడతలో 8 రాష్ట్రాల్లోని 57 స్థానాల్లో ఎన్నికలు నిర్వహించనున్నారు. అంతిమ దశ కావడంతో ఉత్కంఠ కొనసాగనుంది. మరోవైపు అంతిమ దశలో దేశంలోని దిగ్గజాలు పోటీలో ఉన్నారు. 

వారణాసి ఎంపీ స్థానం నుంచి ప్రధాని నరేంద్ర మోదీ పోటీలో ఉండగా, లాలూ ప్రసాద్​ యాదవ్​ కుమార్తె మీసా భారతి, అనురాగ్​ ఠాకూర్​ లాంటి దిగ్గజ నాయకులు పోటీలో ఉండడం విశేషం. 

ఉత్తరప్రదేశ్‌లోని 13 స్థానాలకు 144 మంది అభ్యర్థులు బరిలో ఉన్నారు. బీహార్‌లోని 8 స్థానాల్లో 134 మంది, ఒడిశాలోని 6 స్థానాల్లో 66 మంది, ఝార్ఖండ్‌లో 3 స్థానాల్లో 52 మంది, హిమాచల్ ప్రదేశ్‌లో 4 స్థానాల్లో 37 మంది, పశ్చిమ బెంగాల్‌లోని 9 స్థానాల్లో 124 మంది, పంజాబ్​ 13 స్థానాలు, చండీఘర్​ 1 స్థానంలో ఎన్నికలు జరగనున్నాయి. 

2019లో ఏడోదశ..
జూన్ 1న ఎన్నికలు జరగనున్న ఏడో దశలో 57 స్థానాల్లో 2019లో బీజేపీ పనితీరు బాగానే ఉంది. గత ఎన్నికల్లో ఈ 57 స్థానాల్లో బీజేపీ 25 సీట్లు గెలుచుకోగా, కాంగ్రెస్ 8 సీట్లతో సరిపెట్టుకోవాల్సి వచ్చింది. దీంతో పాటు జేడీయూ 3 సీట్లు, అప్నాదళ్ (ఎస్) 2 సీట్లు, శిరోమణి అకాలీదళ్ 2 సీట్లు, ఆమ్ ఆద్మీ పార్టీ 1, బీజేడీ 2, జేఎంఎం 1, టీఎంసీ 9 సీట్లు గెలుచుకోగలిగాయి. బీజేపీ నేతృత్వంలోని ఎన్డీయే 32 సీట్లు గెలుచుకోగా, యూపీఏకు 9 సీట్లు మాత్రమే, ఇతర పార్టీలకు 14 సీట్లు వచ్చాయి.