సరసమైన ధరలకు ఔషధాలు

ఢిల్లీ: ప్రధానమంత్రి నరేంద్ర మోదీ ప్రారంభించిన ‘సంజీవని’ దేశంలోని ప్రతీ ఒక్కరి చెంతకు వైద్యం, ఔషధాలు సరసమైన ధరలకు అందుబాటులోకి తేవాలన్నదే ప్రభుత్వ ఉద్దేశ్యమని కేంద్రరసాయాలు, ఎరువులు, ఆరోగ్య శాఖ మంత్రి మన్సుఖ్​ మాండవియా  అన్నారు. ఇందులో భాగంగా మంగళవారం ఢిల్లీలో జన్​ఔషధి కేంద్రాల కోసం క్రెడిట్​ సహాయ కార్యక్రమాన్ని, వెబ్​సైట్​ను ప్రారంభించారు. స్మాల్ ఇండస్ట్రీస్ డెవలప్‌మెంట్ బ్యాంక్ ఆఫ్ ఇండియా (సిడ్బీ), ఫార్మాస్యూటికల్స్ అండ్ మెడికల్ డివైసెస్ బ్యూరో ఆఫ్ ఇండియా (పీఎంబీఐ)ల మధ్య జరిగిన ఎంఓయూ మార్పిడికి మంత్రి మాండవియా అధ్యక్షత వహించారు.  ఈ సందర్భంగా జరిగిన సభనుద్దేశించి మన్సుఖ్​ మాట్లాడుతూ.. 2014లో కేవలం 80 జన్​ ఔషధి కేంద్రాల నుంచి నేడు దేశవ్యాప్తంగా 11వేల కేంద్రాలు ఏర్పాటు చేశామన్నారు. వీటి ద్వారా 10 నుంచి 12 లక్షల మంది సరసమైన ధరలకు ఒక్కరోజులే మందులను కొనుగోలు చేస్తున్నారని తెలిపారు. చిన్న పారిశ్రామికవేత్తలు ఈ కేంద్రాలను మరిన్నింటిని తెరిచేందుకు ముందుకు రావాలని మంత్రి పిలుపునిచ్చారు. సిడ్బీ, పీఎంబీఐల మధ్య జరిగిన ఎంవోయూ పట్ల మంత్రి హర్షం వ్యక్తం చేశారు. ఈ ఒప్పందం వల్ల దేశ ప్రజలకు చౌకధరల్లోనే మందులు అందుబాటులోకి వస్తాయని ఆశాభావం వ్యక్తం చేశారు. అదే సమయంలో ఆయా సంస్థలు జన్​ ఔషధి కేంద్రాల ప్రాముఖ్యతలను, అవసరాన్ని వినియోగదారులకు తెలియజేయాలని కోరారు. రాబోయే రెండేళ్లలో 25వేల కేంద్రాలను తెరుస్తామన్నారు. జన్​ ఔషధి కేంద్రాల ద్వారా రెండు వేల రకాల మందులు 300 రకాల శస్ర్తచికిత్సలకు సంబంధించిన పరికరాలు అత్యంత తక్కువ ధరలకే అందుతున్నాయన్నారు.