మౌల్వీ సోహెల్ అరెస్టు రాజకీయ నాయకులే టార్గెట్​

గాంధీనగర్​: ఇటీవలే పట్టుబడ్డ మౌల్వీ సోహెల్​ విచారణలో విస్తుగొలిపే నిజాలు బయటపడ్డాయి. దేశంలోని కీర్తి, ప్రఖ్యాతలున్న రాజకీయ నాయకులను హతమార్చేందుకు ప్రణాళికలు రచించినట్లు గుజరాత్​ పోలీస్​ కమిషనర్​ అనుపమ్​ సింగ్​ గెహ్లాట్ తెలిపారు. శుక్రవారం ఆయన మీడియాకు ఈ విషయాలపై సమాచారం అందించారు. అయితే వీరు గురిపెట్టిన కీలక నేతలు ఎవరన్న విషయంపై మాత్రం నోరు విప్పకపోవడం గమనార్హం. 

ఎన్నికల నేపథ్యంలో, ఇంటెలిజెన్స్​ సమాచారంతో మౌల్వీ సోహెల్​ ను అరెస్టు చేశామన్నారు. ఈ మ్యాడ్యూల్​ పై విచారణ కొనసాగుతుందన్నారు. ఇతన్ని అరెస్టు చేసిన సందర్భంగా రెండు వేర్వేరు ఐడీ కార్డులను స్వాధీనం చేసుకున్నామని స్పష్టం చేశారు.  ఈ ఐడీ కార్డులు సూరత్​, మహారాష్ర్టకు చెందినవన్నారు. ఇతనితోపాటు మరో నిందితుడు మహ్మదలీ (షెహనాజ్​)ను కూడా అరెస్టు చేశామన్నారు. ఇతను సిమ్​ కార్డులు వాడకంలో నేర్పరి అని తెలిపారు. ఇతనిపేరు మీద 17 సిమ్​ కార్డులు, 42 నకిలీ ఈ మెయిల్​ ఐడీలు ఉన్నట్లు గుర్తించామని తెలిపారు. మరొక నిందితుడు రజా తన మొబైల్​ ను ధ్వంసం చేశాడని పేర్కొన్నారు. మొబైల్​ ను ఫోరెన్సిక్​ లాబొరేటరీకి పంపించామన్నారు. దీని ద్వారా మరింత సమాచారం రాబడతామని స్పష్టం చేశారు. వీరు కొన్ని పాక్​ లోని సిమ్​ లను వాడుతున్నట్లు గుర్తించామని పేర్కొన్నారు. 

వీరంతా ఒక మాడ్యూల్​ గా ఏర్పడి దేశంలోని ప్రముఖులను టార్గెట్​ చేశారన్నారు. ఇందులో చాలామంది హస్తముందన్నారు. వారంతా భారత్​ లో లేరని సమయానుసారం భారత్​ కు అక్రమ మార్గంలో వచ్చి తమ పని పూర్తి చేసుకొని వెళ్లాలనే ఉద్దేశ్యంలో ఉన్నారని పేర్కొన్నారు.