మహాదేవ్​ బెట్టింగ్​ సౌరభ్​ అరెస్ట్​

దుబాయ్​ లో ఇంటర్​ పోల్​ సక్సెస్​
విదేశాంగశాఖ, హోమంత్రిత్వ శాఖ సహకారం
యాప్​ తో వేల కోట్లు సంపాదన
నిర్వహణ వెనుక బడా రాజకీయ నాయకుల హస్తం
సినీ ప్రముఖులకు భారీ ముడుపులు
గుట్టు విప్పేందుకు భారత దర్యాప్తు సంస్థలు సిద్ధం
మరో 12 రోజుల్లో భారత్​ కు నిందితుడు

నా తెలంగాణ, న్యూ ఢిల్లీ: భారత్​ ఇంటర్​ పోల్​ సక్సెస్​ సాధించింది. ఎట్టకేలకు తప్పించుకు తిరుగుతున్న మహాదేవ్​ బెట్టింగ్​ యాప్​ ప్రధాన సూత్రధారి సౌరభ్​ చంద్రకర్​ ను యూఏఈలో గురువారం అదుపులోకి తీసుకున్నారు. అతన్ని దుబాయ్​ నుంచి భారత్​ తీసుకువచ్చేందుకు చేపట్టాల్సిన న్యాయప్రక్రియను మొదలు పెట్టారు. ఇతన్ని భారత్​ తీసుకువచ్చేందుకు సుమారుగా 10 నుంచి 12 రోజుల సమయం పట్టే అవకాశం ఉన్నట్లు కేంద్ర ఇంటర్​ పోల్​ అధికారులు శుక్రవారం మీడియాకు సమాచారం ఇచ్చారు. విదేశీ వ్యవహారాల శాఖ, హోంమంత్రిత్వ శాఖ సహకారంతో ఈడీ అభ్యర్థన మేరకు ఈ ఆపరేషన్​ ను గుట్టుచప్పుడు కాకుండా నిర్వహించి నిందితున్ని దుబాయ్​ లోని ఒక హోటల్​ నుంచి అదుపులోకి తీసుకున్నారు. 2023లోనే దుబాయ్​ పోలీసులు ఇతన్ని అదుపులోకి తీసుకున్నా భారత్​ కు అప్పగించేందుకు పలు అవాంతరాలు, అడ్డంకులు ఎదురయ్యాయి. ఎట్టకేలకు అన్ని అడ్డంకులు తొలిగిపోయాయని అధికారులు స్పష్టం చేశారు. 

ఈ యాప్​ భాగస్వామ్యం, నిర్వహణలో సౌరభ్​ చంద్రకర్​ కు కొందరు రాజకీయ ప్రముఖులు కూడా సహకరించారు. అదే సమయంలో పలువురు బాలీవుడ్​ సినీ ప్రముఖులు కూడా యాప్​ ద్వారా బాగానే వెనకేసుకున్నారు. ఈ ఉదంతం గతంలో దుమారం రేపడం, పలువురు యాప్​ ద్వారా నష్టపోయి ఆత్మహత్యలు చేసుకోవడంతో కేంద్రం దర్యాప్తు చేపట్టింది. ఇందులో కీలక విషయాలు వెలుగులోకొచ్చాయి. 2019లో ఒక సామాన్యుడిలా చిన్న జ్యూస్​ షాప్​ నడుపుకునే సౌరభ్​ యాప్​ ద్వారా వేల కోట్లు వెనకేసుకున్నాడు. ఇందులో పలువురు ప్రముఖ రాజకీయ నాయకులకు కూడా వాటా ఉన్నట్లు కేంద్ర దర్యాప్తు బృందాలు అనుమానిస్తున్నాయి. ఏది ఏమైనా అనేక ప్రయత్నాల తరువాత సౌరభ్​ ను అరెస్టు చేయడంతో యాప్​ నిర్వహణ గుట్టు వెనుక ఇంకా ఉన్న ప్రధాన సూత్రధారులెవ్వరనే విషయం త్వరలోనే తేలిపోనుండడంతో ఇతనికి సహకరించిన ప్రముఖ రాజకీయ నాయకుల గుండెల్లో రైళ్లు పరుగెడుతున్నాయి.