అరుణాచల్​ లో కమల వికాసం

ఇటానగర్​: అరుణాచల్ ప్రదేశ్ లో కమలం పార్టీ హావా కొనసాగిస్తోంది. 60 అసెంబ్లీ స్థానాలలో ఆదివారం ఉదయం నుంచి లెక్కింపు ప్రారంభమైంది. మధ్యాహ్నం 12.30 గంటల వరకు 17 స్థానాల్లో బీజేపీ గెలుపొందగా, 37స్థానాల్లో ముందంజలో ఉంది. కాంగ్రెస్​ పార్టీ ఇక్కడ ఖాతా తెరవకపోవడం గమనార్హం. 2019లో బీజేపీ 42 స్థానాలతో అరుణాచల్​ లో విజయం సాధించింది. ఈసారి సుమారుగా 50కు పైగా స్థానాల్లో బీజేపీ విజయం సాధించనుంది. కాగా ఎన్​ పీపీ (నేషనల్​ పీపుల్స్​ పార్టీ) 5, ఇతరులు 8 స్థానాల్లో ముందంజలో ఉన్నారు.

ఫెమా ఖాండూ..

అరుణాచల్​ బీజేపీ సీఎం ఫెమా ఖాండూ కొనసాగుతున్నారు. మరోమారు ఆయన్నే సీఎంగా కొనసాగనున్నారు. ఈయన తండ్రి దోర్జీ ఖండూ. అరుణాచల్​ ప్రదేశ్​ మాజీ సీఎం. ఫెమా ఖండూ తొలిసారిగా 2016లో సీఎం పదవిని చేపట్టారు. అప్పుడు ఫెమా కాంగ్రెస్​ పార్టీలో ఉండడం విశేషం. అనంతర పరిణామాల్లో బీజేపీలో చేరారు. పలు మంత్రి పదవులను కూడా నిర్వహించారు. 

ఇటానగర్​ లోని బీజేపీ పార్టీ ఆఫీసులో సంబురాలు మొదలయ్యాయి. బ్యాండు మేళం, రంగులు చల్లుకుంటూ, స్వీట్లు తినిపించుకుంటూ నాయకులు బిజీబిజీగా సంతోషంగా డ్యాన్సులు చేస్తూ కనిపించారు. అయితే అరుణాచల్​ ప్రదేశ్​ విజయంలో కేంద్రమంత్రి కిరణ్​ రిజుజూ కీలక పాత్ర పోషించారు. 

సిక్కింలో ఎస్​ కేఎం హావా..

మరోవైపు సిక్కింలో 32 అసెంబ్లీ స్థానాలున్నాయి. అధికారం కోసం 17 సీట్లు గెలుపొందాల్సిన అవసరం ఉంది. ఇక్కడ ఎస్​ కేఎం (సిక్కిం క్రాంతికారి మోర్చా) 11 స్థానాల్లో గెలుపొందగా మరో 20 స్థానాల్లో ముందంజలో ఉంది. ఎస్​డీఎఫ్​ (సిక్కిం డెమోక్రటిక్​ ఫ్రంట్​) 1 స్థానంలో ముందంజలో కొనసాగుతోంది. ఇక్కడ బీజేపీ, కాంగ్రెస్​ లు ఖాతా తెరవలేదు. 

ప్రేమ్​ సింగ్​ తమాంగ్​..

ఎస్​ కేఎం పార్టీని 2013 ఫిబ్రవరి 4న స్థాపించారు. పార్టీ స్థాపనలో ఉపాధ్యాయుడిగా పనిచేసిన ప్రేమ్​ సింగ్​ తమాంగ్​ క్రియాశీలకంగా వ్యవహరించారు. 2019లో సిక్కిం సీఎం పదవిని చేపట్టారు. సిక్కింలో ఎస్​ కేఎం పార్టీ విజయం ఖాయమే కావడంతో మరోమారు ప్రేమ్​ సింగ్​ తమాంగ్​ సీఎం పదవిని చేపట్టనున్నారు.

ఈ రెండు ప్రాంతాలకు ఏప్రిల్​ 19న ఎన్నికలు జరిగాయి. రెండు ప్రాంతాల్లోనూ హస్తం పార్టీకి తిరస్కరణే ఎదురైంది. కమలం పార్టీ ఒక రాష్​ర్టంలో అధికారం చేపట్టబోతోంది.