డ్రగ్స్ రహితంగా భారత్
కేంద్ర హోంశాఖ మంత్రి అమిత్ షా
రాయ్ పూర్: దేశాన్ని డ్రగ్స్ రహితంగా మార్చేందుకు అన్ని చర్యలు తీసుకుంటున్నామని కేంద్ర హోంశాఖ మంత్రి అమిత్ షా అన్నారు. ఆదివారం చత్తీస్ ఘడ్ లోని రాయ్ పూర్ లో నార్కోటిక్స్ కంట్రోల్ బ్యూరో ప్రాంతీయ యూనిట్ కార్యాలయాన్ని ప్రారంభించారు. ఈ సందర్భంగా డ్రగ్స్ నియంత్రణపై ఉన్నతాధికారులతో సమీక్షా సమావేశం నిర్వహించారు. ఈ సమావేశంలో సీఎం విష్ణుదేవ్ సాయ్, కేంద్ర హోంశాఖ సహాయ మంత్రి నిత్యానంద్ రాయ్, డిప్యూటీ సీఎం విజయ్ శర్మ, పోలీసు ఉన్నతాధికారులు హాజరయ్యారు.
ప్రధాని మోదీ నేతృత్వంలో 2047 విజన్ తో అభివృద్ధి భారత్ దిశగా ముందుకు వెళుతున్నామన్నారు. ఈ సంకల్పంతో డ్రగ్స్ ను పూర్తిగా కట్టడి చేసేందుకు కట్టుబడి ఉన్నామన్నారు. అసాంఘిక కార్యకలాపాలు, మాదకద్రవ్యాలు వంటి చెడు ఘటనలు దేశ భద్రతకు భంగం వాటిల్లేలా చేస్తున్నాయన్నారు. ఆర్థిక వ్యవస్థను బలహీన పరుస్తున్నాయని తెలిపారు. అందుకే జీరో టాలరెన్స్ విధానంతో ప్రభుత్వం ముందుకు సాగాలని నిర్ణయించుకుందని అమిత్ షా తెలిపారు. అనంతరం రాయ్ పూర్ లో ఏక్ పేడ్ మా కే నామ్ మోదీ పిలుపు మేరకు మొక్కలు నాటారు. ప్రతీ ఒక్కరూ పర్యావరణ రక్షణకు మొక్కలు నాటాలని పిలుపునిచ్చారు.
