ఏడు రాష్ట్రాలకు హీట్​ వేవ్​ రెడ్​ అలర్ట్​ రాజస్థాన్​ లో ఎండలకు 8మంది మృతి

నా తెలంగాణ, న్యూ ఢిల్లీ: ఏడు రాష్ట్రాల్లో ఐదు రోజుల పాటు హీట్‌వేవ్ రెడ్​ అలర్ట్​ ను ఐఎండీ జారీ చేసింది. హీట్​ వేవ్​ ప్రభావంతో రాజస్థాన్​ లో గురువారం ఒక్కరోజే 8 మరణాలు సంభవించినట్లు శుక్రవారం అధికారులు వెల్లడించారు. ఢిల్లీ, హరియాణా, పంజాబ్​, యూపీ, రాజస్థాన్​, మధ్యప్రదేశ్​, గుజరాత్​ లకు రెడ్​  అలర్ట్​ జారీ చేసింది. 40 నుంచి 50 డిగ్రీల వరకు ఉష్ణోగ్రతలు కొనసాగే అవకాశం ఉందని పేర్కొంది. ప్రజలు మధ్యాహ్నం వేళ బయటికి వెళ్లవద్దని హెచ్చరించింది. బార్మర్​ లో గత రెండు రోజులుగా 49 డిగ్రీల ఉష్ణోగ్రత నమోదవుతుంది. భారత్​ – పాక్​ సరిహద్దులో ఏకంగా 53 డిగ్రీల ఉష్ణోగ్రతలు నమోదవుతున్నట్లు ఐఎండీ స్పష్టం చేసింది. అన్ని రాష్ట్రాల్లో ఎండలు విజృంభిస్తుండడంతో వైద్యశాఖ వైద్యులు, పారా మెడికల్​ సిబ్బంది సెలవులను రద్దు చేసింది. 

మరోవైపు యూపీలోని గౌతమ్​ బుద్ధ నగర్​, గ్రేటర్​ నోయిడాలోని అన్ని పాఠశాలలకు సెలవులు ప్రకటించారు. సీడబ్ల్యూసీ (సెంట్రల్​ వాటర్​ కమిషన్​) దేశంలోని 150 రిజర్వాయర్లలో నీటిమట్టం కనిష్ఠ స్థాయికి చేరుకున్నట్లు పేర్కొంది. ఢిల్లీలో యమునా నది నీటిమట్టం తగ్గిందని తెలిపింది. దీంతో పలు ప్రాంతాల్లోని నీటి సరఫరాకు అంతరాయం ఏర్పడుతున్నట్లు పేర్కొంది.

హీట్​ వేవ్​ కారణంగా దేశంలో విద్యుత్​ డిమాండ్​ 237 గిగావాట్లుగా ఉన్నట్లు కేంద్ర విద్యుత్​ శాఖ డేటా విడుదల చేసింది. ఈ ఎండకాలంలో ఇదే అత్యధిక డిమాండ్​ అని పేర్కొంది. 2023లో కూడా 243.27 గిగావాట్ల విద్యుత్​ డిమాండ్​ ఏర్పడిందని వివరించారు. ఎండలకు తాళలేక ప్రజలు ఫ్​యాన్లు, కూలర్లు,ఏసీలను ఆశ్రయిస్తుండడంతో విద్యుత్​ డిమాండ్​ భారీగా పెరుగుతోందని తెలిపింది. దేశంలోని అన్ని రాష్ట్రాల్లో విద్యుత్​ డిమాండ్​ కంటే ఈ ఐఎండీ రెడ్​ అలర్ట్​ జారీ చేసిన హీట్​ వేవ్​ రాష్ట్రాల్లో విద్యుత్​ డిమాండ్​ అత్యధికంగా ఉందని విద్యుత్​ శాఖ స్పష్టం చేసింది. 

హీట్​ వేవ్​ భారీ నుంచి తప్పించుకునేందుకు ప్రజలు చల్లటి పానీయాలను తీసుకుంటున్నారు. మరోవైపు స్విమ్మింగ్​ పూల్​ లు,  పార్కులలో మధ్యాహ్నం వేళ జనాలు సేదదీరుతున్నారు. ఇక ఆయా రాష్ట్రాల్లోని జూపార్కుల్లో ఉన్న జంతువులకు హీట్​ వేవ్​ తో తట్టుకోలేక పోతుండడంతో అధికారులు చర్యలు చేపట్టారు. చల్లటి నీటిని వాటిపై రెండుసార్లు చల్లుతున్నారు. చిన్న జంతువు కోసం గడ్డితో వేసిన శామియానాలు లాంటివి ఏర్పాటు చేశారు. శాఖాహార జంతువులైతే హీట్ వేవ్​ తట్టుకోలేక నెమళ్ల పించాల్లో దాగడం కొసమెరుపు.