ఎయిర్ ఇండియా విమానంలో మంటలు
185 మంది సురక్షితం కుడి ఇంజిన్ లో సాంకేతిక లోపం పైలెట్ అప్రమత్తత వల్లే తప్పిన ముప్పు
బెంగళూరు: బెంగళూరు నుంచి కొచ్చి వెళుతున్న ఎయిర్ ఇండియా ఎక్స్ ప్రెస్ విమానం (ఐఎక్స్–1132)లో శనివారం అర్థరాత్రి అకస్మాత్తుగా మంటలు చెలరేగాయి. దీంతో విమానాన్ని అత్యవసరంగా బెంగళూరు విమానాశ్రయంలో ల్యాండింగ్ చేశారు. విమానంలో 179 మంది ప్రయాణికులు, ఆరుగురు సిబ్బంది ఉన్నారు. సురక్షితంగా విమానం ల్యాండ్ కావడంతో అధికారులు ఉపిరి పీల్చుకున్నారు. అర్థరాత్రి విమానం టేకాఫ్ కాగానే మంటలను పైలెట్ గుర్తించి సకాలంలో సమాచారం అందించి సురక్షితంగా ల్యాండ్ చేశాడని అధికారులు తెలిపారు. వెంటనే ప్రయాణికులను సురక్షితంగా కిందకు దింపుతూనే విమానంలో మంటలు చెలరేగకుండా చర్యలు తీసుకున్నామన్నారు. ఇప్పటివరకు జరిపిన దర్యాప్తులో విమానం కుడి ఇంజిన్ లో మంటలు చెలరేగాయన్నారు. ప్రమాదానికి గల కారణాలను అన్వేషిస్తున్నామని ఎయిర్ ఇండియా అధికారులు స్పష్టం చేశారు.
