శరద్ ఫోటో వాడొద్దు ప్రచారంపై దృష్టి పెట్టాలి
Do not use Sharad's photo and focus on the campaign
అజిత్ వర్గానికి సుప్రీం సూచన
నా తెలంగాణ, న్యూ ఢిల్లీ: ఎన్సీపీ (అజిత్ పవార్) తన కాళ్లమీద తాను నిలబడి ఎన్నికల ప్రచారం నిర్వహించాలని, శరద్ పవార్ ఫోటోను ప్రచారంలో వాడొద్దని సుప్రీం కోర్టు స్పష్టం చేసింది. అజిత్ పవార్ ఎన్నికల ప్రచారంలో శరద్ పవార్ ఫోటో, గుర్తును వినియోగించుకుంటూ ఓటర్లను ప్రలోభపెట్టేందుకు ప్రయత్నిస్తున్నారని ఇది చట్టవిరుద్ధమని ఒక పార్టీలో నుంచి వెళ్లిన వారు ఆ పార్టీకి చెందిన వారి ఫోటోను ఉపయోగిస్తూ ప్రచారం నిర్వహించడంపై అభ్యంతరం వ్యక్తం చేస్తూ సుప్రీంకోర్టులో ఎన్సీపీ (శరద్ పవార్) వర్గం పిటిషన్ దాఖలు చేసింది. ఈ పిటిషన్ పై బుధవారం సుప్రీంకోర్టు జస్టిస్ సూర్యకాంత్, జస్టిస్ ఉజ్వల్ భుయాన్‌లతో కూడిన ద్విసభ్య ధర్మాసనం విచారణ చేపట్టింది.
సుప్రీంకోర్టులో ఇరువర్గాల వాదనలు విన్న ద్విసభ్య ధర్మాసనం అనంతరం తీర్పును వెల్లడించింది. మహారాష్ర్ట ఎన్నికల్లో 36 స్థానాల్లో అజిత్, శరద్ పవార్ వర్గీయుల ప్రత్యక్ష పోటీ ఉంది. అయితే ఇప్పటికే పలు గ్రామీణ ప్రాంతాలలో ఎన్సీపీ చీలికలపై ఓటర్లకు పూర్తి అవగాహన లేదు. ఇదే అంశంపై లబ్ధి పొందేందుకు పవార్ కుటుంబంలోని ఇద్దరూ ప్రయత్నిస్తున్నారు. ఈ నేపథ్యంలో సుప్రీంకోర్టు ఎన్నికలు దగ్గరపడుతున్న దృష్ట్యా ఇరువురూ ప్రచారంపై దృష్టి పెట్టాలని ఆదేశించింది. పార్టీ, గుర్తు వివాదాల విషయాలను కోర్టుకు వదిలిపెట్టాలని, ఒకరి ఫోటోను మరొకరు వాడుతూ ప్రారం చేపట్టరాదని సుప్రీం కోర్టు స్పష్టం చేసింది.
