డిజిటల్ చెల్లింపులు రూ. 1,669 లక్షల కోట్లు
ఐదు నెలల గణాంకాలను విడుదల చేసిన ఆర్థిక మంత్రిత్వ శాఖ
నా తెలంగాణ, న్యూ ఢిల్లీ: 2024–25 ఆర్థిక సంవత్సరం ఐదు నెలల్లో (ఏప్రిల్, మే, జూన్, జూలై, ఆగస్ట్) డిజిటల్ చెల్లింపులు రూ. 1,669 లక్షల కోట్లుగా నమోదయ్యాయని కేంద్ర ఆర్థిక మంత్రిత్వ శాఖ స్పష్టం చేసింది. శనివారం మంత్రిత్వ శాఖ డిజిటల్ చెల్లింపులకు సంబంధించిన వృద్ధిపై నివేదిక వెల్లడించింది.
చెల్లింపుల పరిమాణం రూ. 8,659 కోట్లకు చేరుకుందని తెలిపింది. 2017–18లో రూ. 2,071 కోట్ల నుంచి 2023–24లో 18,737 కోట్లకు పెరిగిందని తెలిపింది. వార్షిక వృద్ధిని గణిస్తే 44 శాతం వృద్ధి నమోదైనట్లు పేర్కొంది. డిజిటల్ చెల్లింపుల్లో యూపీఐ మూలస్తంభంగా ఉంది. ఎఫ్ వై 2017–18 ప్రకారం చూసుకుంటే 92 కోట్ల నుంచి 2023–24 ఎఫ్ వైలో 13,116 కోట్లకు పెరిగింది.
యూపీఐ ద్వారా వేగవంతమైన చెల్లింపులు చేసే ప్రయత్నాలు సత్ఫలితాలిస్తున్నాయని పేర్కొన్నారు. యూపీఐతోబాటు, రూపే ద్వారా కూడా వేగంగా చెల్లింపులు జరుగుతుండడం సంతోషకరమని పేర్కొంది. అదే సమయంలో యూపీఐ ద్వారా యూఏఈ, సింగపూర్, భూటాన్, నేపాల్, శ్రీలంక, ఫ్రాన్స్, మారిషస్ వంటి దేశాల్లో కూడా అంతర్జాతీయ చెల్లింపులు సులభతరం అయ్యాయని పేర్కొన్నారు. ఇది దేశ ఆర్థిక పురోగతిని మరింత వృద్ధి దిశగా తీసుకువెళుతుందని, మెరుగుపరుస్తుందని ఆర్థికమంత్రిత్వ శాఖ తెలిపింది.
