కొరడా దెబ్బలతో అన్నామలై నిరసన!

కోయంబత్తూరు: తమిళనాడు బీజేపీ రాష్ర్ట అధ్యక్షుడు అన్నామలై వినూత్న నిరసనలకు తెరతీశారు. శుక్రవారం ఉదయం తన ఇంటి బయట కొరడాతో కొట్టుకున్నాడు. చెన్నైలోని అన్నా యూనివర్సిటీ విద్యార్థినులకు రక్షణ కల్పించడంలో డీఎంకే సీఎం స్టాలిన్​ ప్రభుత్వం విఫలమైందని ఆరోపించారు. డీఎంకేను గద్దె దించే వరకు చెప్పులు లేకుండా ఉంటానని శపథం చేసిన మరుసటి రోజే కొరడాతో కొట్టుకుంటూ నిరసనకు దిగారు. ఆయన కొరడాతో కొట్టుకోవడాన్ని జీర్ణించుకోలేని ఓ అభిమాని ఆయన్ను అడ్డుకోగా అన్నామలై అభిమానిని దూరంగా వెళ్లాలన్నాడు. కాగా విద్యార్థినిని లైంగికంగా వేధించిన కేసులో అరెస్ట్​ అయిన విద్యార్థి డీఎంకే నాయకులతో కలిసి ఉన్న ఫోటోలు సామాజిక మాధ్యమాల్లో హల్​ చల్​ చేస్తున్నాయి. అందుకే అతనిపై చర్యకు వెనకాడుతున్నారని అన్నామలై మండిపడ్డారు. అతనిపై నిర్భయ యాక్ట్​ కింద కేసు బుక్​ చేసి కఠిన చర్యలు తీసుకోవాలని అన్నామలై డిమాండ్​ చేశారు.