ఉభయసభలు వాయిదా
జేపీసీ కమిటీ పదవీకాలం పొడిగింపునకు ఆమోదం ప్రియాంకగాంధీ ప్రమాణ స్వీకారం
నా తెలంగాణ, న్యూ ఢిల్లీ: పార్లమెంట్, రాజ్యసభల్లో గురువారం కూడా ప్రతిపక్షాల వాయిదా తీర్మానాలపై చర్చించాలనే డిమాండ్ పై తీవ్ర గందరగోళం నెలకొనడంతో సభ శుక్రవారానికి వాయిదా పడింది. గౌతమ్ అదానీపై ఆరోపణలు, సంభాల్‌లో కలకలం, మణిపూర్ హింస, నిరుద్యోగం, ద్రవ్యోల్బణం వంటి అనేక అంశాలపై చర్చ జరగాలని డిమాండ్ చేస్తూ ప్రతిపక్షం సభలో గందరగోళం సృష్టించింది.
వక్ఫ్ బిల్లుపై ఏర్పడిన జేపీసీ పదవీకాలం పొడిగింపు..
వక్ఫ్ సవరణ బిల్లుపై ఏర్పాటైన జాయింట్ పార్లమెంటరీ కమిటీ పదవీకాలాన్ని పొడిగించారు. లోక్‌సభ ఆమోదించింది. ఆమోదం పొందిన తర్వాత, బడ్జెట్ సమావేశాల చివరి రోజు వరకు జేపీసీ పదవీకాలం ఉంటుంది. పార్లమెంటు శీతాకాల సమావేశాల్లో వక్ఫ్ బిల్లుపై జేపీసీ తన నివేదికను సమర్పించాల్సి ఉండగా, ప్రతిపక్ష ఎంపీల డిమాండ్ మేరకు బడ్జెట్ సమావేశాల చివరి రోజు వరకు దాని పదవీకాలాన్ని పొడిగించారు.
ప్రియాంక గాంధీ ప్రమాణ స్వీకారం..
పార్లమెంటులో ప్రియాంక గాంధీ పదవీ ప్రమాణ స్వీకారం చేశారు. ఈ సందర్భంగా రాజ్యాంగ ప్రతిని చేతిలోకి తీసుకొని ప్రమాణ స్వీకారం చేశారు. ఎంపీగా ఎన్నికైన తరువాత తొలిసారిగా ఆమె పార్లమెంట్ కు వచ్చారు. ప్రమాణ స్వీకారంలో సోనియా, రాహుల్ గాంధీ కూడా ఆమెతోపాటు పార్లమెంటుకు చేరుకున్నారు. ప్రియాంక వయనాడ్ స్థానం నుంచి ఉప ఎన్నికల్లో విజయం సాధించారు.
సమావేశాలు..
లోక్‌సభలో సభ ప్రారంభమైన వెంటనే అదానీ అంశంపై దుమారం రేగింది. రాజ్యసభలోనూ దుమారం రేగింది. అనంతరం ఉభయ సభల కార్యకలాపాలు తొలుత మధ్యాహ్నం 12 గంటలకు, ఆ తర్వాత రోజంతా వాయిదా పడ్డాయి. లోక్‌సభలో వక్ఫ్ (సవరణ) బిల్లుపై జాయింట్ ప్యానెల్ పదవీకాలం 2025 బడ్జెట్ సెషన్ చివరి రోజు వరకు పొడిగింపు ప్రతిపాదనను ప్యానెల్ చైర్‌పర్సన్ జగదాంబికా పాల్ లోక్‌సభలో ప్రవేశపెట్టగా ఆమోదం పొందింది.
