2025 ఉద్యోగుల జీతాల్లో 9.5 శాతం వృద్ధి
డబ్లూటీడబ్ల్యూ నివేదిక వెల్లడి
నా తెలంగాణ, న్యూ ఢిల్లీ: భారత్ లో 2025లో ఉద్యోగుల జీతాల్లో 9.5 శాతం వృద్ధి నమోదయ్యే అవకాశం ఉందని డబ్ల్యూటీడబ్ల్యూ (వర్క్ టు గెదర్ విత్) ఇండియా కన్సల్టింగ్ అధికారి రాజుల్ మాథుర్ ఒక ప్రకటనలో మంగళవారం తెలిపారు. ఈ సంస్థ అందించిన నివేదికను వెల్లడించారు. కరోనా అనంతరం ఉద్యోగులు స్థిరత్వాన్ని కోరుకుంటుండడంతో సంస్థల లావాదేవీల్లో లాభాలు నమోదవుతున్నాయి. దీనివల్ల ఆయా సంస్థలు ఉద్యోగుల పనితీరు పట్ల సంతృప్తితో ఉన్నాయి. ఈ నేపథ్యంలో 2025లో ఫార్మాస్యూటికల్స్ (10 శాతం), తయారీ (9.9 శాతం), బీమా (9.7 శాతం), క్యాప్టివ్, ఎస్ఎస్వో రంగాలు (9.7 శాతం), రిటైల్ (9.6 శాతం) వేతన వృద్ధి ఉండే అవకాశం ఉందన్నారు. సాధారణ పరిశ్రమలు, సాఫ్ట్‌వేర్, వ్యాపార సేవల రంగంలో 9 శాతం వరకు జీతం పెరుగుదల ఉండే అవకాశం ఉందని వివరించారు.
భారత్ లోనే గాక వియత్నాం, ఇండోనేషియా, ఫిలిప్పీన్స్, చైనా, థాయ్ లాండ్, హాంగ్ కాంగ్, ఆస్ర్టేలియా, మలేషియా, జపాన్ లలోనూ పనిచేస్తున్న ఉద్యోగుల జీతాల్లో కూడా వృద్ధి నమోదవుతుందన్నారు. కాకపోతే భారత్ లోనే అత్యధిక శాతం వేతనం పెరుగుతుందన్నారు. మిగతా దేశాల్లో పెరుగుదల శాతం తగ్గుతుందని నివేదికలు స్పష్టం చేశాయని పేర్కొన్నారు. ఈ సర్వే కోసం 162 దేశాల్లో 32వేల మంది యాజమాన్యాల అభిప్రాయాలను పరిగణనలోకి తీసుకున్నాక ఈ నివేదికను రూపొందించారు.
