అసోం ఆప్​ అభ్యర్థుల ప్రకటన ఇండి కూటమి, కాంగ్రెస్​ కు షాక్​

నా తెలంగాణ, న్యూ ఢిల్లీ: అసోం ఎంపీ ఎన్నికల్లో ఆప్​ తరఫున ముగ్గురు అభ్యర్థులను ఆ పార్టీ గురువారం ప్రకటించింది. దీంతో కూటమిలోని ప్రధాన పార్టీ కాంగ్రెస్​ కు భారీ షాక్​ తగిలింది. సీట్ల పంపకాలపై జాప్యంపై తీవ్ర అసహనం వ్యక్తం చేసింది. దిబ్రూగఢ్​ నుంచి మనోజ్​ ధనోవర్​, గుహవాటి నుంచి భాబెన్​ చౌదరి, తేజ్​ పూర్​ నుంచి రిషి రాజ్​ కౌటిన్యలను బరిలోకి దింపుతున్నట్లు ఆప్​ పార్టీ నేషనల్​ జనరల్​ సెక్రెటరీ సందీప్​ పాఠక్​ ప్రకటించారు. ఎన్నికలలో గెలుపే లక్ష్యంగా నిర్ణయం తీసుకున్నామన్నారు. కూటమిలో భాగస్వాములం అయినప్పటికీ ఈ సీట్లలో తాము పోటీ చేస్తున్నట్లు ఏకపక్షంగా నిర్ణయం తీసుకున్నట్లు కుండబద్ధలు కొట్టింది. సీట్ల పంపకాలపై ఇంకా చర్చలు అనవసరమన్నారు. వేగంగా స్పందిస్తేనే సత్ఫలితాలు సాధిస్తామని పాఠక్​ అభిప్రాయం వ్యక్తం చేశారు. కూటమిలోని మిగతా పార్టీల్లో ఏకాభిప్రాయమే కత్తిమీద సాములా మారిందన్నారు. ఈ నేపథ్యంలో తాము పోటీ చేయనున్న స్థానాలను సుస్థిరం చేసుకునే దిశలో చర్యలు తీసుకున్నామని పాఠక్​ స్పష్టం చేశారు. అసోంలో మొత్తం 14 ఎంపీ స్తానాలున్నాయి. 2019లో బీజేపీ 9 స్థానాలు, కాంగ్రెస్​ 3, ఏఐయూడీఎఫ్​ 1, స్వతంత్ర అభ్యర్థి 1 స్థానాలను కైవసం చేసుకున్నారు. 

గతంలో బీజేపీ హావా.. ప్రస్తుతం ఆ పార్టీకే ఎక్కువ స్థానాలు..

బీజేపీ నుంచి హోరెన్​ సింగ్​ బే, దిబ్రూగఢ్​ నుంచి రామేశ్వర్​ తేలీ, గుహవాటి నుంచి క్వీన్​ ఓజా, జోర్హాత్​ నుంచి తోపాన్​ కుమార్​ గొగోయ్​, కరీంగంజ్​ నుంచి క్రిపానాథ్​ మల్లా, లకీంపూర్​ నుంచి ప్రధాన్​ బూర్హా, మంగళడోయి నుంచి దిలీప్​ సైకా, సిల్చార్​ నుంచి రాజ్​ దీప్​ రాయ్​, తేజ్​ పూర్​ నుంచి పల్లబ్​ లోచన్​ దాస్​ లు విజేతలుగా నిలిచారు. 

కాగా ఆప్​ ప్రకటించిన మూడు స్థానాల్లోనూ బీజేపీ అభ్యర్థులు ప్రస్తుతం మరింత బలాన్ని సాధించుకున్నారు. అసోంలోనూ బీజేపీ ప్రస్తుతం 14 స్థానాలను కైవసం చేసుకునే దిశలోనే ముందుకు సాగుతుండడం గమనార్హం.