రాష్ట్ర అప్పు ఎంత? హామీలు ఎట్ల అమలు చేస్తరు?

నా తెలంగాణ, హైదరాబాద్​: కాంగ్రెస్​ ప్రభుత్వం రాష్ట్ర ఆర్థిక పరిస్థితి విషయంలో ప్రజలకు స్పష్టత ఇవ్వడం లేదని బీజేపీ ఆదిలాబాద్​ ఎమ్మెల్యే పాయల్​ శంకర్​ అన్నారు. రాష్ట్ర సర్కారు అప్పు ఎంత? ఇచ్చిన హామీలు ఎలా అమలు చేస్తారనే దానిపై ప్రభుత్వం జవాబు చెప్పాలని ఆయన కోరారు. ఈ మేరకు శుక్రవారం గవర్నర్​ ప్రసంగానికి ధన్యవాదాలు తెలిపే తీర్మానంలో భాగంగా ఆయన మాట్లాడారు. రాష్ట్ర ప్రభుత్వం ఆర్థిక పరిస్థితిని ఎట్లా గాడిలో పెడ్తుందో చెప్పాలని అన్నారు. ‘‘మంత్రులు, ప్రభుత్వ పెద్దలు రోజూ ఆరు గ్యారంటీల గురించే మాట్లాడుతున్నారు. మరి మిగతా హామీలకు ఎవరు గ్యారంటీ? కాంగ్రెస్​ పార్టీ విజయం సాధించడంలో ఏకకాలంలో రూ.2 లక్షల రైతు రుణమాఫీ హామీ కీలకమైనది. కానీ ఎప్పటిలోపు రుణమాఫీ చేస్తారో ప్రభుత్వం చెప్పడం లేదు. గవర్నర్​ ప్రసంగంలో ఈ విషయం ఉంటే బాగుండేది. కేంద్ర ప్రభుత్వం రైతులకు ఎంతో మేలు చేయాలనే ఉద్దేశంతో ప్రధాన మంత్రి ఫసల్​ బీమా యోజన పథకం తెచ్చింది. గత సర్కారు ఈ పథకానికి ప్రీమియం కట్టక ఆపేసింది. ఇప్పుడు కాంగ్రెస్​ ప్రభుత్వమైనా దీనిపై నిర్ణయం తీసుకోవాలి. రైతు బీమా ఇవ్వడంలో అభ్యంతరం లేదు. కానీ రైతు చనిపోవడానికి కారణమైన పంట నష్టానికి కూడా బీమా ఉండాలని బీజేపీ డిమాండ్​ చేస్తున్నది”అని ఆయన స్పష్టం చేశారు.

రెండు పార్టీలను ఓడించిన చరిత్ర బీజేపీది

గత సర్కారు హయాంలో రాష్ట్రంలో మద్యం ఏరులై పారిందని, ప్రతి గ్రామంలో పది నుంచి పదిహేను బెల్ట్​ షాపులు సర్కారే నడిపించిందని ఎమ్మెల్యే పాయల్​ శంకర్​ గుర్తు చేశారు. అధికారంలోకి వచ్చిన వెంటనే బెల్టు షాపులు మూసివేస్తామని హామీ ఇచ్చిన కాంగ్రెస్​.. ప్రభుత్వం ఏర్పడి రెండు నెలలు దాటినా.. ఇంకా బెల్టు షాపులను మూసివేయలేదని అన్నారు. ఎప్పుడు మూసివేస్తారో చెప్పాలని సభలో ప్రశ్నించారు. ‘‘రాష్ట్రానికి వేల కోట్ల పెట్టుబడులు తీసుకు వచ్చినట్లు ప్రభుత్వ పెద్దలు చెప్పారు. అయితే పెట్టుబడులు ఎంత సేపు హైదరాబాద్​ కు మాత్రమేనా? వెనుకబడిన ఆదిలాబాద్​, ఆసిఫాబాద్​ లాంటి జిల్లాలకు పెట్టుబడులు, పరిశ్రమలు రావొద్దా? ప్రభుత్వం ఈ విషయంలో ఆలోచన చేయాలి. ప్రధాన మంత్రి నరేంద్ర మోదీ వివిధ ప్రాజెక్టుల ప్రారంభోత్సవం కోసం తెలంగాణకు వస్తే.. గత ప్రభుత్వంలో మాజీ సీఎం కేసీఆర్ స్వాగతం తెలపలేదు. కనీస ప్రొటోకాల్​ పాటించలేదు. కేంద్రంతో సఖ్యతగా మెలగక అనేక అభివృద్ధి కార్యక్రమాల్లో రాష్ట్రానికి రావాల్సిన నిధులను పట్టించుకోక అన్యాయం చేశారు. ఇప్పుడు కాంగ్రెస్​ ప్రభుత్వం కూడా రాజకీయాలకు, పంతాలకు పోయి తెలంగాణకు అన్యాయం చేయొద్దని విజ్ఞప్తి చేస్తున్నాను. బీజేపీ, బీఆర్​ఎస్​ ఒకటేనని కాంగ్రెస్​ అంటున్నది.. కాంగ్రెస్​, బీజేపీ ఒకటేనని బీఆర్​ఎస్​ నాయకులు అంటున్నారు. కానీ బీఆర్​ఎస్​, కాంగ్రెస్​ రెండు పార్టీలను ఓడించిన చరిత్ర బీజేపీది. మా పార్టీ ఏ పార్టీతో పొత్తు పెట్టుకోదు. చట్టసభలో ఇలాంటి వ్యాఖ్యలు చేయడం సరికాదని చెప్తున్నాను”అని పాయల్​ శంకర్​ తెలిపారు.