కుప్వారాలో ఎన్​ కౌంటర్​ ఇద్దరు ఉగ్రవాదులు హతం

శ్రీనగర్​: జమ్మూకశ్మీర్​ లోని కుప్వారాలో భద్రతా బలగాలు ఇద్దరు ఉగ్రవాదులను హతమార్చాయి. శనివారం వేకువజామున ఉగ్రవాదులు సరిహద్దుల వెంట గుగల్​ ధర్​ నుంచి భారత్​ లోకి చొరబడేందుకు యత్నించారు. దీంతో భద్రతాదళాలు, ఉగ్రవాదులకు మధ్య కాల్పులు చోటు చేసుకున్నాయి. కాల్పుల సమాచారం తెలుసుకున్న ఉన్నతాధికారులు మరిన్ని బలగాలను ఆ ప్రాంతానికి పంపారు. ఇరువైపులా జరిగిన కాల్పుల్లో ఇద్దరు ఉగ్రవాదులను భద్రతా దళాలు మట్టుబెట్టాయి. వీరి వద్ద నుంచి భారీ ఎత్తున మందుగుండు సామాగ్రి, ఆయుధాలను స్వాధీనం చేసుకున్నారు. ఆ ప్రాంతంలో ఇంకా సోదాలు కొనసాగుతున్నాయి. మృతి చెందిన ఉగ్రవాదులకు జైష్​ ఏ మహమ్మద్​ తో సంబంధం ఉన్నట్లు అనుమానిస్తున్నారు.