ముగ్గురు ఖలిస్థానీ ఉగ్రవాదులు ఎన్​ కౌంటర్​

పంజాబ్​ పోలీస్​ స్టేషన్​ పై గ్రెనేడ్​ దాడి నిందితులు

లక్నో: యూపీలోని పిలిభిత్​ లో భారీ ఎన్​ కౌంటర్​ జరిగింది. సోమవారం ఉదయం జరిగిన ఈ ఎన్​ కౌంటర్​ లో ముగ్గురు ఖలిస్థానీ ఉగ్రవాదులు హతమయ్యారు. వీరంతా పంజాబ్​ లోని గురుదాస్​ పూర్​ పోలీస్ స్టేషన్​ పై దాడికి పాల్పడిన నిందితులని ఎస్పీ అవినాష్​ పాండే తెలిపారు. నిందితుల వద్ద నుంచి రెండు ఎకె–47లు, బుల్లెట్లు స్వాధీనం చేసుకున్నట్లు చెప్పారు. ఈ ఎన్​ కౌంటర్​ లో ఇద్దరు పోలీసులకు కూడా గాయాలయ్యాయన్నారు.

పిలిభిత్, పంజాబ్ పోలీసులు సోమవారం తెల్లవారుజామున ఈ సంయుక్త ఆపరేషన్ చేపట్టారు. అయితే ఖలిస్థానీ జిందాబాద్​ ఫోర్స్​ కు చెందిన ముగ్గురు ఉగ్రవాదులు బైక్​ పై పారిపోయేందుకు ప్రయత్నిస్తూ ఒక్కసారిగా పోలీసులపై కాల్పులకు తెగబడ్డారు. దీంతో అలెర్టయిన పోలీసులు ఎదురుకాల్పులు జరిపారు. ఈ కాల్పుల్లో గురుదాస్​ పూర్​ కు చెందిన గుర్విందర్​, వీరేంద్రసింగ్​, జస్​ ప్రీత్​ సింగ్​ లు మృతిచెందినట్లు ప్రకటించారు. ఈ ఉగ్రవాదులు డిసెంబర్​ 19న పంజాబ్​ లోని గురుదాస్​ పూర్​ పోలీస్​ స్టేషన్​ పై గ్రెనేడ్లతో దాడికి పాల్పడ్డారు. మృతదేహాలను స్థానికంగా ఉన్న పురా పూర్​ సీహెచ్​ సీకి పోస్టుమార్టం నిమిత్తం తరలించినట్లు పోలీసులు వెల్లడించారు.