ఆర్మీ వాహనంపై ఉగ్రదాడి ఒకరి మృతి

శ్రీనగర్​: జమ్మూకశ్మీర్​ లోని గుల్​ మార్గ్​ లో ఉగ్రవాదులు మరోమారు తెగబడ్డారు. ఆర్మీ వాహనంపై దాడికి పాల్పడ్డారు. గురువారం సాయంత్రం ఉగ్రవాదులు జరిపిన దాడిలో ఐదుగురు జవాన్లకు తీవ్ర గాయాలు, ఆర్మీలో పోర్టర్​ గా విధులు నిర్వహిస్తున్న ఒకరు మృతి చెందారు. గుల్‌మార్గ్‌లోని నాగిన్ ప్రాంతంలో 18 రాష్ట్రీయ రైఫిల్స్ (ఆర్‌ఆర్) వాహనంపై ఈ ఉగ్రదాడి జరిగింది. నియంత్రణ రేఖ (ఎల్‌ఓసీ)కి 5 కిలోమీటర్ల దూరంలో ఉన్న బోట్‌పత్రి నుంచి ఆర్మీ వాహనం వస్తుండగా ఉగ్రవాదులు దాడి చేసినట్లుగా అధికారులు తెలిపారు. వెంటనే విషయం తెలుసుకున్న ఆర్మీ ఉన్నతాధికారులు సంఘటనా స్థలానికి అదనపు బలగాలను రప్పించారు. ఉగ్రవాదుల కోసం సెర్చ్​ ఆపరేషన్​ ను కొనసాగిస్తున్నారు.