జమ్మూకశ్మీర్ అభ్యర్థుల ఎంపికపై షా సమావేశం
హాజరైన ప్రముఖులు రాహుల్ పై షా విమర్శల బాణాలు
నా తెలంగాణ, న్యూ ఢిల్లీ: జమ్మూకశ్మీర్ ఎన్నికలలో అభ్యర్థుల ఎంపికపై బీజేపీ కసరత్తు మొదలు పెట్టింది. కేంద్ర హోంశాఖ మంత్రి అమిత్ షా, బీజేపీ జాతీయాధ్యక్షుడు జేపీ నడ్డా, కేంద్రమంత్రి జి.కిషన్ రెడ్డి, జితేంద్ర సింగ్, జాతీయ ప్రధాన కార్యదర్శి తరుణ్‌ చుగ్‌, జమ్మూకశ్మీర్ బీజేపీ అధ్యక్షుడు రవీందర్ రైనా, దేవేందర్ సింగ్ రాణాలతో న్యూ ఢిల్లీలో శుక్రవారం రాత్రి అత్యవసర సమావేశం నిర్వహించారు.
90 స్థానాలున్న జమ్మూకశ్మీర్ లో మోదీ అభివృద్ధి కార్యక్రమాల తరువాత గ్రౌండ్ లెవల్ లో పరిస్థితిపై కేంద్రమంత్రి అమిత్ షా ఆరా తీశారు. బలమైన అభ్యర్థుల ఎంపికపై కేంద్రమంత్రి కిషన్ రెడ్డి, బీజేపీ రాష్ర్ట అధ్యక్షుడు రైనాలతో సమాచారం సేకరించారు.
2014లో 25 సీట్లను బీజేపీ గెలుచుకొని పీడీపీ (మహబూబా ముఫ్తీ)తో కలిసి ప్రభుత్వాన్ని ఏర్పాటు చేసింది.
మరోవైపు కాంగ్రెస్, ఎన్సీ (నేషనలిస్ట్ కాంగ్రెస్–ఫరూక్ అబ్దుల్లా) పార్టీల పొత్తుతో రాజకీయ సమీకరణాలపై ప్రభావం పడే అవకాశం ఉండటంతో బీజేపీ ఇరుపార్టీలను ఎదుర్కునే బలమైన అభ్యర్థుల వేటలో పడింది.
సమావేశానికి ముందు కేంద్రమంత్రి అమిత్ షా మీడియాతో మాట్లాడారు. దళితులు, గుజ్జర్లు, బకర్వాల్‌లు, పహాడీలకు రిజర్వేషన్లు రద్దు చేయాలనే జేకేఎన్‌సీ మేనిఫెస్టోకు రాహుల్ గాంధీ మద్దతు ఇస్తున్నారా? అని ప్రశ్నించారు. రిజర్వేషన్ల విషయంపై కాంగ్రెస్ పార్టీ తమ విధానాన్ని స్పష్టం చేయాల్సిన అవసరం ఉందని అన్నారు.దేశ ఐక్యతను కాంగ్రెస్ దెబ్బతీస్తోందన్నారు. పదే పదే భారత భారత ఐక్యతను ఫణంగా పెడుతోందని మండిపడ్డారు.
నేషనల్ కాన్ఫరెన్స్ ప్రత్యేక రాష్ర్టం ఏజెండాను రాహుల్ సమర్థిస్తారా? మరోసారి ఈ ప్రాంతాన్ని ఉగ్రవాదంలోకి నెడతారా? వేర్పాటువాదం, సరిహద్దుల్లో ఉగ్రవాదం, రాళ్లదాడులు, ఆర్థిక వ్యవస్థ తదితర ప్రశ్నలను అమిత్ షా రాహుల్ గాంధీకి వేశారు. వీటన్నింటికీ సమాధానం చెప్పాలన్నారు. నేషనల్ కాన్ఫరెన్స్ తాము లేవనెత్తిన అంశాలను తమ ఓటు బ్యాంకు రాజకీయం కోసం వాడుకుంటోందని ఇప్పటికే అనేకమార్లు స్పష్టమైందని ఆ పార్టీతో పొత్తుపెట్టుకొని దేశ సమగ్రతకు కాంగ్రెస్ భంగం కలిగిస్తోందని అమిత్ షా మండిపడ్డారు.
