దుఃఖ సమయంలో రాజకీయాలా?

స్మారక స్థలంపై వివాదం సృష్టించొద్దు
ప్రతీ ఒక్కరినీ గౌరవించుకుంటాం
సమాధి నిర్మాణంపై ఖర్గేకు అమిత్​ షా తెలిపారు
అభివృద్ధికి పునాది వేసిన మహానీయుడు డా. మన్మోహన్​ సింగ్​
భూసేకరణ, ట్రస్టు ఏర్పాటు, భూ బదలాయింపు పూర్తవగానే పనులు చేపడతాం

నా తెలంగాణ, న్యూ ఢిల్లీ: మాజీ ప్రధాని డా. మన్మోహన్​ సింగ్​ స్మారక స్థలంపై వివాదం సృష్టించొద్దని బీజేపీ ఎంపీ సుధాంశు త్రివేది కాంగ్రెస్​ పై మండిపడ్డారు. ఆయన మృతిని కూడా రాజకీయాలకు వాడుకోవడం పట్ల కాంగ్రెస్​ పార్టీ నాయకులు, విధానాలపై అగ్గిమీద గుగ్గిలమయ్యారు. శనివారం సుధాంశు త్రివేది స్మారక స్థలం వివాదంపై స్పందించారు. 

ప్రధాని నరేంద్ర మోదీ ప్రభుత్వం అన్ని పార్టీల నేతలకు గౌరవం ఇచ్చిందన్నారు. త్వరలోనే మాజీ ప్రధాని డా. మన్మోహన్​ సింగ్​ సమాధి నిర్మాణ పనులు కూడా జరుగుతాయన్నారు. మన్మోహన్​ కు గౌరవం ఇచ్చేందుకు ఎన్డీయే ప్రభుత్వం కట్టుబడి ఉందన్నారు. దేశ ఆర్థికాభివృద్ధికి గొప్ప పునాది వేసిన మన్మోహన్​ సింగ్​ జ్ఞాపకార్థం స్మారక స్థలం, సమాధి నిర్మాణంపై మంత్రివర్గ సమావేశంలో నిర్ణయించామన్నారు. ఈ విషయాన్ని స్వయానా కేంద్ర హోంశాఖ మంత్రి అమిత్​ షా కాంగ్రెస్​ జాతీయాధ్యక్షుడు మల్లిఖార్జున్​ ఖార్గేకు చెప్పినా రాజకీయ వివాదం ఎందుకు సృష్టిస్తున్నారని నిలదీశారు.  దేశమంతా దుఃఖంలో ఉన్న సమయంలో కాంగ్రెస్ రాజకీయాలు చేయడం మానుకోవాలన్నారు. ఆయన జీవించి ఉన్నప్పుడు ఏనాడూ గౌరవించని కాంగ్రెస్​ మరణానంతరం రాజకీయాలకు తెరదీయడం దురదృష్టకరమన్నారు. పదేళ్లపాటు సుధీర్ఘ ప్రధానిగా దేశానికి సేవలందించిన మహోన్నత వ్యక్తి డా. మన్మోహన్​ సింగ్​ అన్నారు. కనీసం ఇలాంటి సమయంలోనైనా రాజకీయ వివాదాలు, ప్రకటనలకు దూరం ఉండాలన్నారు.

 మోదీ ప్రభుత్వం సెంటిమెంట్​ లకు అతీతంగా ఎదిగిందన్నారు. ప్రతీ నాయకుడికి గౌరవం ఇచ్చిందన్నారు. భూసేకరణ, ట్రస్టు ఏర్పాటు, భూ బదలాయింపు వంటి ప్రక్రియలు పూర్తవ్వగానే స్మారక సమాధి పనులు చేపడతామన్నారు. ఇందులో రాజకీయం చేయడానికి ఏముందని సుధాంశు త్రివేది కాంగ్రెస్​ పార్టీ నేతల తీరుపై ఆగ్రహం వ్యక్తం చేశారు.