సమయం కేటాయింపుపై మమత అవాస్తవం

నా తెలంగాణ, న్యూ ఢిల్లీ: పశ్చిమ బెంగాల్​ సీఎంకు ఇచ్చిన సమయంలో ఆమె అభిప్రాయాలను నీతి ఆయోగ్​ కౌన్సిల్​ ముందు ఉంచారని, సమయం కేటాయించలేదన్నది పూర్తి అవాస్తవమని నీతి ఆయోగ్​ సీఈవో బీవీఆర్ సుబ్రమణ్యం అన్నారు. శనివారం నీతి ఆయోగ్​ సమావేశం అనంతరం ఆయన మీడియాతో మాట్లాడుతూ.. సీఎం మమతా బెనర్జీ ఆరోపణలపై వివరణ ఇచ్చారు. సీఎం మమత మధ్యాహ్నం లంచ్​ తరువాత మాట్లాడాల్సి ఉందన్నారు. అయినా ఆమె విన్నపం మేరకు తొలుత అవకాశాన్ని ఆమెకే ఇచ్చామన్నారు. ఆమెకు 7 నిమిషాలు మాట్లాడే సమయం అందరిలానే కేటాయించామన్నారు. అనంతరం సమయం ముగిసినా ఆమె అదనపు సమయాన్ని కోరలేదన్నారు. దీంతో ఈ సమావేశంలో ఉన్న ఆటోమెటేడ్​ మైక్ లు సమయానికి మించి అభ్యర్థన చేసుకోకుంటే కట్​ అయిపోతాయని తెలిపారు. అనంతరం మమతా బెనర్జీ బయటికి వెళ్లిపోయారని సుబ్రహ్మణ్యం తెలిపారు. ఇంతకుమించి సమావేశంలో ఏం జరగలేదని సీఈవో తెలిపారు.  సమవేశంలో అనేక రాష్ట్రాలు సీఎంలు, కేంద్ర పాలిత ప్రాంతాలు  పాల్గొన్నందున అందరికీ అంతే సమయం కేటాయించామని తెలిపారు. బిహార్​ లో బడ్జెట్​ సమావేశాలు జరుగుతున్నందున నితీశ్​ హాజరు కాలేకపోయారని సుబ్రమణ్యం స్పష్టం చేశారు.