కర్ణాటక ప్రభుత్వానివి ప్రగల్భాలే

బెంగళూరు: రాష్ట్రానికి పన్నుల పంపిణీ కేంద్ర ప్రభుత్వంపై కర్ణాటక ప్రభుత్వం చేస్తున్న అసత్య ప్రచారంపై కేంద్ర ఆర్థిక శాఖ మంత్రి నిర్మలా సీతారామన్​ మండిపడ్డారు. ఆదివారం బెంగళూరులో మీడియాతో నిర్మలా సీతారామన్​ మాట్లాడారు.

కర్నాటక రాష్ట్ర ప్రభుత్వం ఆర్థిక విధానాలను అనుసరిస్తూ, గత రెండేళ్లలో రెవెన్యూ మిగులుతో ప్రగల్భాలు పలికిన రాష్ట్రం ఇప్పుడు రెవెన్యూ లోటు ఆర్థిక వ్యవస్థగా మారిందని ఆర్థిక మంత్రి తెలిపారు. బహిరంగ మార్కెట్‌లో రుణాలు లక్ష కోట్ల రూపాయలకు పైగా పెరిగాయి. గత రెండేళ్లలో జాతీయ సగటు 5.39 శాతం కంటే తక్కువగా ఉన్న ద్రవ్యోల్బణం జాతీయ సగటు 5.4 శాతం కంటే 6.1 శాతానికి పెరిగింది. పెట్రోల్ ధరలు, పాల ధరలు పెరగడం, ప్రాపర్టీ గైడెన్స్ విలువ, స్టాంప్ డ్యూటీ, వాహనాల రిజిస్ట్రేషన్ ఫీజు, వాహనాలపై లైఫ్ టైం ట్యాక్స్ పెరగడమే ఇందుకు కారణమని ఆమె చెప్పారు. రాష్ట్రంలో మూలధన వ్యయం తగ్గిందని, దీని ప్రభావం ఉపాధి కల్పనపై పడుతుందని ఆమె అన్నారు. రాష్ట్రంలో ఎస్సీ, ఎస్టీ నిధులు స్వాహా చేశారని, మంత్రి పదవికి రాజీనామా చేయాల్సి వచ్చిందని ఆర్థిక మంత్రి నిర్మలా సీతారామన్‌ అన్నారు. కర్ణాటకలో శాంతిభద్రతలు క్షీణించాయని, దీనివల్ల పెట్టుబడిదారులు రాష్ట్రానికి రావడాన్ని నిరుత్సాహపరిచారని నిర్మలా సీతారామన్​ కర్ణాటక ప్రభుత్వంపై మండిపడ్డారు. 

2004 నుంచి 2014 వరకు కర్ణాటకకు కేవలం రూ. 81,791 కోట్లు మాత్రమే అందాయన్నారు.అదే 2014 నుంచి 2024 మధ్య కాలంలో కర్ణాటకకు రూ. 2,95,818 కోట్లు అందజేశామన్నారు. యూపీఏ హయాంలో వార్షిక కేటాయింపులు రూ. 8,179 కోట్లుగా ఉండగా, అది ఎన్డీయే హయాంలో రూ. 45,485 కోట్లకు పెరిగిందన్నారు. 

యూపీఏ హయాంలో రూ. 60,779 కోట్ల నుంచి ఎన్డీయే హయాంలో రూ 2,36,955 కోట్లకు గ్రాంట్​ ఇన్​ ఎయిడ్​ పెరిగిందని తెలిపారు. కర్ణాటక మౌలిక సదుపాయాల కోసం రూ. 10,441 కోట్లు, కల్బుర్గిలో పీఎం మిత్రా టెక్స్​ టైల్​ పార్క్​ పథకానికి రూ. 200 కట్లు, స్మార్ట్​ సిటీకి రూ. 6428 కోట్ల రూపాయలను కేటాయించామన్నారు. 

ఈ రైల్వే బడ్జెట్‌లో రాష్ట్రానికి అత్యధికంగా రూ. 7,559 కోట్లు కేటాయింపులు జరిగాయని మంత్రి తెలిపారు. యూపీఏ హయాంలో పదేళ్లపాటు రాష్ట్రానికి వచ్చిన రూ. 835 కోట్ల కంటే ఇది ఎక్కువన్నారు. కర్ణాటకలో 47,016 కోట్ల రూపాయల విలువైన 3840 కిలోమీటర్ల ట్రాక్ డబ్లింగ్‌తో 31 రైల్వే ప్రాజెక్టులు కొనసాగుతున్నాయని మంత్రి చెప్పారు. ప్రధానమంత్రి ఆవాస్ యోజన, ఎంఎస్​ ఎంఈలకు ప్రోత్సాహకాలు, ఆర్​ అండ్​ డీ రుణ పథకాలు, ఉపాధి కల్పించే ప్రోత్సాహకాలు, అప్రెంటీస్‌షిప్ పథకాల ద్వారా బెంగళూరు కేంద్ర బడ్జెట్ నుంచి లబ్ది పొందిందని ఆర్థిక మంత్రి చెప్పారు.