ముఖర్జీ సిద్ధాంతాలతో ముందుకు మేనిఫెస్టో విడుదలలో జేపీ. నడ్డా

నా తెలంగాణ, న్యూఢిల్లీ: శ్యామా ప్రసాద్​ ముఖర్జీ సిద్ధాంతాలను ముందుకు తీసుకువెళ్లేందుకు నిరంతరం కృషి చేస్తున్నామని బీజేపీ జాతీయాధ్యక్షులు జేపీ. నడ్డా అన్నారు. ఇందులో భాగంగానే ఆదివారం బీజేపీ 2024 సార్వత్రిక ఎన్నికలకు ముందు మేనిఫెస్టోను (సంకల్ప పత్ర్) విడుదల చేశారు. ఈ సందర్భంగా నడ్డా మాట్లాడుతూ.. ‘సబ్​ కా సాథ్​, సబ్​ కా వికాస్​’ అనే నినాదంతో ప్రధాని మోదీ నేతృత్వంలో ముందుకు వెళతామన్నారు. దేశ ప్రజలు కూడా బీజేపీకి స్పష్టమైన మెజార్టీతో మరోమారు అవకాశం ఇవ్వనున్నారని నడ్డా తెలిపారు.

2014, 2019లో ప్రజాశీస్సులు లభించాయని, మరోమారు హ్యాట్రిక్​ గా ప్రజలు తమనే ఆశీర్వదించనున్నారన్నారు. ప్రజాసంక్షేమం కోసం, దేశ హితం కోసం అనేక సంక్షేమ కార్యక్రమాలను చేపట్టామన్నారు. ముఖ్యంగా దేశంలోని నారీశక్తికి అధిక ప్రాధాన్యం, మౌలిక సదుపాయాల కల్పన, అభివృద్ధికి ఊతం ఇచ్చామని స్పష్టం చేశారు. 2014 కంటే ముందు దేశ పరిస్థితులు ఏ విధంగా ఉండేవో దేశ ప్రజలకు చెప్పాల్సిన అవసరం లేదన్నారు. ఎక్కడ చూసినా అవినీతి, అక్రమాలు, ఉగ్రదాడులు, కుటుంబ రాజకీయాలతో దేశం విషమ పరిస్థితులను అనుభవిస్తూ ఉందన్నారు. ప్రస్తుత ప్రభుత్వం పదేళ్లలోనే ఆత్మనిర్భర్​ భారత్​ నిర్మాణాన్ని చేపట్టిందని జేపీ నడ్డా అన్నారు. బీఆర్​ అంబేద్కర్​ కు నివాళులర్పించారు. ఆయన బాటలోనే బీజేపీ సామాజిక న్యాయం దిశగా ముందుకు సాగుతోందని స్పష్టం చేశారు.