వైద్యబీమాపై ధీమా లభించేనా?

బడ్జెట్​ లో ఈ రంగంపై నిర్మలమ్మ నిర్ణయమేంటో?

నా తెలంగాణ, సెంట్రల్​ డెస్క్​: హెల్త్​ కేర్​, ఫార్మా రంగం, వైద్య బీమాలపై కేంద్ర బడ్జెట్​ లో కేంద్ర ఆర్థిక మంత్రి నిర్మలా సీతారామన్​ ఏ మేరకు కరుణ చూపనున్నారు? బీమాల ద్వారా బాధితులకు దక్కే మొత్తంపై పన్నులను తగ్గిస్తారా? లేదా హెల్త్​ కేర్​, ఫార్మా రంగాలకు వరాలు కురిపిస్తారా? అన్నది త్వరలోనే తేలిపోనుంది. ఇప్పటికే కేంద్ర ప్రభుత్వం ప్రాణాలను రక్షించే కొన్ని రకాల మందులపై జీఎస్టీని తగ్గించింది. అయితే వీటిపై జీఎస్టీని పూర్తిగా ఎత్తివేయాలనే డిమాండ్​ కొనసాగుతుంది. అదే సమయంలో విదేశాల నుంచి కీలక సమయాల్లో దిగుమతి చేసుకుంటున్న మందులపై దిగుమతి సుంకాన్ని కూడా పూర్తిగా రద్దు చేయాలనే డిమాండ్​ ఉంది.

ఔషధాల ధరలు తక్కువగా ఉండాలని, సులభంగా బీమా సొమ్ము దక్కేలా చర్యలు చేపట్టాలని, ఫార్మా, హెల్త్​ కేర్​ రంగాలలో పన్నులు తగ్గిస్తే ప్రజలకు ఆధునాతన, సాంకేతిక వైద్యం మరింత చేరువవుతుందనే ప్రభుత్వానికి విజ్ఞప్తులు వచ్చాయి. ప్రస్తుతం భారత్​ లో చాలా మంది నిరుపేదలకు బీమాకు దూరంగా ఉన్నారు. దీంతో కేంద్ర, ఆయా రాష్ర్ట ప్రభుత్వాలే రూ. 5 నుంచి రూ. 10 లక్షల వరకు బీమాను కొనసాగిస్తున్నాయి. వీరంతా నిరుపేదలైనందున ప్రైవేట్​ బీమా వైపు మొగ్గు చూపడం లేదు. అదే సమయంలో ప్రస్తుతం బీమా తీసుకొని లబ్ధి పొందాలనుకున్న వారికి నిబంధనల పేరుతో పలు ఆటంకాలు ఎదురవుతున్నాయి. ఈ నేపథ్యంలో కూడా వైద్యబీమా తీసుకోవాలని పలువురు భావిస్తున్నా, ఇచ్చే సమయాల్లో వీరి నియమ నిబంధనలపై అనుమానాలు వ్యక్తం చేస్తూ వెనుకడుగు వేస్తున్నారు. ప్రభుత్వ జోక్యంతో ఈ పరిస్థితిలో మార్పు వచ్చే అవకాశం ఉంది. 

దేశంలోని ప్రతీ పౌరుడికి జీవిత బీమా ఉండాలన్న లక్ష్యంతో కేంద్రం అడుగులు వేస్తుంది. ఇందుకు గాను కేంద్రం బడ్జెట్​ లో ఏ మేరకు కేటాయిస్తుందని, పన్ను తగ్గింపులు ఏ మేరకు ఉండనున్నాయోననే ఆశలు ప్రజల్లో చిగురిస్తున్నాయి. కేంద్ర ప్రభుత్వం ఫార్మా రంగానికి భారీ ఊరటనిచ్చే ప్రకటనలు వెలువడే అవకాశాలు ఎక్కువగా కనిపిస్తున్నాయి. 2030 నాటికి ఈ రంగం 130 బిలియన్​ డాలర్లకు చేరుకుంటుంది.2047 ప్రధాని మోదీ సూచించిన విజన్​ నాటికి ఈ రంగం రూ. 450 బిలియన్​ డాలర్లకు చేరుకోవాలనే లక్ష్యాన్ని నిర్దేశించుకుంది. ఇందుకోసం దేశీయ ఫార్మా రంగ తయారీదారులను, పరిశ్రమ వర్గాలకు ప్రోత్సాహంతోపాటు భారీ బడ్జెట్​ కేటాయింపులు, పన్ను తగ్గింపులు, దిగుమతి సుంకాల తగ్గింపులను ఆశిస్తున్నారు. మరీ కేంద్రమంత్రి నిర్మలమ్మ ఏ మేరకు ఈ రంగాన్ని ఆదుకుంటారో వేచి చూడాల్సిందే.