ఉత్తరాఖండ్​ లో యూసీసీ అమలు

బీజేపీ తన వాగ్ధానాన్ని నెరవేర్చుకోవడం సంతోషకరం
నెరవేరిన ప్రధాని మోదీ దృక్పథం

డెహ్రాడూన్​: ఉత్తరాఖండ్​ లో యూనిఫాం సివిల్ కోడ్ (యూసీసీ)​ సోమవారం నుంచి అమల్లోకి వచ్చింది. దీంతో ఉత్తరాఖండ్​ యూసీసీ అమలైన తొలి రాష్ర్టంగా అవతరించింది. ఉత్తరాఖండ్​ సీఎం పుష్కర్​ సింగ్​ ధామి మాట్లాడుతూ యూసీసీ అమలుపై అన్ని జిల్లాల పోలీసు, ఇతర అధికారులకు శిక్షణ పూర్తయ్యిందన్నారు. ఇక ఈ చట్టం తమ రాష్ర్టంలో ఎలాంటి ఒడిదుడుకులు లేకుండా కొనసాగుతుందన్నారు. ఇందుకు సహకరించిన కేంద్రం, రాష్ర్ట నాయకులు, అధికారులకు ధన్యవాదాలు తెలిపారు. వివక్షత లేని సమాజ నిర్మాణమే తమ లక్ష్యమన్నారు. కులం, మతం, వ్యక్తిగత పౌర విషయాలలో ఈ చట్టం ద్వారా ఏకరూపంలోకి తీసుకువస్తామని ప్రకటించారు. 

అభివృద్ధి చెందిన, వ్యవస్థీకృతమైన, సామరస్యపూర్వకమైన, స్వావలంబన కలిగిన దేశం కోసం ప్రధాని మోదీ విస్తృత దృక్పథానికి దోహదపడే యూనిఫాం సివిల్ కోడ్ కు ఉత్తరాఖండ్​ నుంచే తొలి అడుగు పడడం సంతోషకరమన్నారు. 2022లో బీజేపీ ఇచ్చిన హామీ నెరవేర్చిందన్నారు. ఈ చట్టం ద్వారా సామాజిక, ఆర్థిక న్యాయానికి ప్రోత్సాహం లభిస్తుందన్నారు. సంక్షేమ రాజ్యాంగ స్థాపన మార్గదర్శకాలను తూ.చ. తప్పకుండా పాటిస్తామన్నారు. 

యూసీసీ ప్రకారం ఏం మారబోతుంది..
– యూసీసీ అమలు తరువాత వివాహ నమోదు తప్పనిసరి.
– ఏ మతం, కులం, ఏ వర్గానికైనా విడాకులకు ఒకే రకమైన చట్టాన్ని అమలు చేస్తారు. 
– ప్రతి మతం, కులానికి చెందిన ఆడపిల్లల వివాహానికి కనీస వయస్సు 18 సంవత్సరాలు పూర్తవ్వాలి.
– ఒక బిడ్డను దత్తత తీసుకునే హక్కు అన్ని మతాలకు ఉంటుంది.
– ఉత్తరాఖండ్‌లో హలాలా, ఇద్దత్ వంటి పద్ధతులు పూర్తిగా నిలిపివేస్తారు. 
– భార్యాభర్తలు జీవించి ఉంటే మళ్లీ పెళ్లి చేసుకోవడం పూర్తిగా నిషేధం విధించబడుతుంది. ఇది నేరంగా పరిగణించబడుతుంది.
– ఆస్తిలో అబ్బాయిలు, అమ్మాయిలకు సమాన వాటా దక్కుతుంది.
– లివ్-ఇన్ రిలేషన్షిప్స్ (సహజీవనం) కోసం రిజిస్ట్రేషన్ తప్పనిసరి.
– లివ్-ఇన్ రిలేషన్‌షిప్‌లో ఉన్న వారి వయస్సు 18 నుంచి 21 ఏళ్లలోపు ఉంటే తల్లిదండ్రుల అనుమతి తప్పనిసరి. 
– లివ్-ఇన్ మ్యారేజ్ ద్వారా జన్మించిన బిడ్డకు, వివాహిత జంట పిల్లలకి సమానమైన హక్కులు లభిస్తాయి.